Qorǵanys mınıstriniń orynbasary garnızondardaǵy tsıfrlyq ofıtserlerdiń jumysyn tekserdi
SEMEI. KAZINFORM — Abaı jáne Aıagóz garnızondarynda Qorǵanys mınıstriniń tsıfrlandyrý jónindegi orynbasary Darhan Ahmedıev áskerı bólimder men mekemelerdiń qyzmetine tsıfrlyq tehnologııalardy engizýdiń nátıjeliligin zerdeledi. Bul týraly Qorǵanys mınıstrligi málim etti.
28738, 10810 áskerı bólimderinde ol jaýyngerlik daıyndyqty esepke alý men taldaýdy aqyldy josparlaıtyn «Bes qarý» baǵdarlamalyq modýlin tájirıbelik paıdalaný barysyn tekserdi.
Jańa modýl iske qosylysymen barlyq deńgeıdegi qolbasshylyq jekelegen áskerı qyzmetshilerdiń de, bólimshelerdiń de daıyndyq barysy týraly senimdi aqparat ala alady. Jasandy ıntellekt tańdalǵan kezeńge tereń taldaý júrgizip, atys, fızıkalyq nemese arnaıy daıyndyq sııaqty naqty kórsetkishterdi jaqsartý boıynsha usynystar beredi.
Baǵdarlamalyq modýldi testileý Abaı, Aıagóz jáne Jetisý garnızondarynyń áskerı bólimderinde de ótýde. Ony engizý jeke quramnyń oqytý sapasyn arttyrýǵa yqpal etetin bolady.
Mınıstrdiń orynbasary Darhan Ahmedıev 36803 áskerı bóliminiń ákimshilik aýmaǵyna beınebaqylaý uıymdastyrýdy tekserip, ony óristetýge buıryq berdi. Kelesi qadam osy bólimniń áskerı tehnıka parkiniń aýmaǵyn beınekameralarmen jabdyqtaý bolyp otyr.
Jergilikti áskerı basqarý organyndaǵy tsıfrlyq transformatsııasynyń negizgi aspektileri týraly mınıstrdiń orynbasaryna Abaı oblysynyń qorǵanys isteri jónindegi departamentiniń bastyǵy polkovnık Rýslan Omarov baıandady.
Qorǵanys mınıstriniń orynbasary Darhan Ahmedıev jumys saparynyń qorytyndysy boıynsha Qarýly kúshterdiń qyzmetine aqparattyq júıelerdi ýaqtyly jáne sapaly engizý jóninde naqty tapsyrmalar berdi.
Buǵan deıin habarlanǵandaı, Qarýly kúshter ulttyq Aitu messendjerine kóship jatyr.