Qorǵanys mınıstrliginiń «Juldyzdy jigitteri» Jaidarman TOP lıgasyna joldama aldy
ASTANA. KAZINFORM — Astanada Qazaqstan Jaıdarman odaǵy 22-shi maýsymynyń resmı ashylýy «Maýsymashar-2026» respýblıkalyq festıvali ótti, dep habarlaıdy Qorǵanys mınıstrliginiń baspasóz qyzmeti.
«Kıno maýsymy» dep atalǵan dúbirli dodaǵa elimizdiń túkpir-túkpirinen 200-ge jýyq komanda qatysty. Onyń ishinde Qorǵanys mınıstrligine qarasty áskerı bólim ofıtserlerinen quralǵan komanda men áskerı oqý oryndarynyń kýrsanttary da bar.
Áskerı komandalar sahnaǵa erekshe daıyndyqpen shyqty. Byltyr «Qazaqstan CUP» lıgasynda úzdik úshtikten kóringen «Juldyzdy jigitter» qurama komandasy komandır men jeke quram arasyndaǵy baılanysty sahnada sheber beınelese, Saǵadat Nurmaǵambetov atyndaǵy Qurlyq áskerleri áskerı ınstıtýtynyń «Juldyzdy kýrsanttary» men Radıoelektronıka jáne baılanys áskerı-ınjenerlik ınstıtýtynyń «Baılanys jigitteri» oqý orny qabyrǵasyndaǵy qyzyqty sátterin ázilmen ushtastyra bildi.
— 2010 jyldary Jaıdarman sahnasynda áskerı komandalar jıirek óner kórsetetin. Tipti, «Sarbazdar kýbogy» degen jarys ta ótken. Sońǵy eki jylda jaýyngerlerden quralǵan jaıdarmanshylar qaıta jandanyp kele jatqany qýantady. Áskerı ómirdi, Otan qorǵaýdy nasıhattaý arqyly el qorǵaıtyn jastardy tárbıeleý — barlyǵymyzdyń ortaq mindetimiz, — dedi «Qazaqstan KVN Odaǵy» Respýblıkalyq jastar qoǵamdyq birlestiginiń prezıdenti Esen Eleýken.
Óner men ázilge sheber jaýyngerler áskerı ómirdiń qatań tártibin sahnada ázilmen árlep, mýzykalyq nómirler arqyly kórermenge erekshe kóńil-kúı syılady.
Qyzyqqa toly saıystyń qorytyndysynda «Juldyzdy jigitter» Jaidarman TOP joǵary lıgasyna joldama aldy. Al kýrsanttarymyz «Qazaqstan CUP» lıgasynda óner kórsetetin bolady.
Buǵan deıin Qorǵanys mınıstrligi sarbazdarǵa qatysty taraǵan beınejazbaǵa pikir bildirdi.