Qorǵanys mınıstrliginiń Ortalyq áskerı orkestri Esil jaǵalaýyn áýenge bóledi
ASTANA. KAZINFORM — Astana kúnine oraı Qazaqstan Respýblıkasy Qarýly kúshteri Ulttyq áskerı-patrıottyq ortalyǵynyń Ortalyq áskerı orkestri elorda turǵyndary men qonaqtaryna merekelik mýzykalyq baǵdarlama usyndy.
Áskerı orkestr Kenesary han eskertkishinen bastaý alǵan marsh-paradpen óner kórsetti. Mýzykalyq sherý Esil ózeniniń jaǵalaýymen ótip, Atyraý kópiri arqyly Ortalyq saıabaqqa deıin jalǵasty. Sherý barysynda orkestr «Almaty», «Amangeldi» jáne «Qazaq marshy» shyǵarmalaryn oryndap, Esil jaǵalaýyn ásem áýenmen terbedi. Aǵa áskerı dırıjer, Ortalyq áskerı orkestrdiń kórkemdik jetekshisi maıor Nurlan Kýchkarovtyń aıtýynsha, Astana kúnine arnalǵan bul merekelik is-sharanyń basty maqsaty – elordalyqtar men qala qonaqtaryna kóterińki kóńil-kúı qalyptastyrý, áskerı orkestrdiń ónerin keńinen tanystyrý jáne ulttyq mýzykalyq murany dáripteý.
– Astana kúni – barsha qazaqstandyqtar úshin erekshe mereke. Osyǵan oraı biz áskerı jáne ulttyq mýzykany úılestirgen arnaıy kontserttik baǵdarlama daıyndadyq. Búgingi marsh-parad pen plats-kontsert arqyly elorda turǵyndary men qonaqtaryna merekelik atmosfera qalyptastyryp, áskerı orkestr óneriniń ereksheligin kórsetýge tyrystyq. Mundaı mádenı is-sharalar jastardyń patrıottyq rýhyn nyǵaıtyp, ulttyq ónerge degen qyzyǵýshylyǵyn arttyrady dep senemiz, – dedi maıor Nurlan Kýchkarov.
Marsh-paradtan keıin Ortalyq saıabaqta plats-kontsert (defıle) ótti. Kontsert baǵdarlamasynda «Qazaq sývenıri» kompozıtsııasy, qazaq ánderinen, Nurǵısa Tilendıevtiń shyǵarmalarynan jáne «Dos-Muqasan» ansambliniń ánderinen popýrrı oryndaldy. Áskerı orkestrdiń óneri kórermenderdiń ystyq yqylasyna bólenip, ulttyq mýzykany keńinen nasıhattaǵan taǵylymdy mádenı sharalardyń birine aınaldy.
Aıta ketelik Nura aýdanynda jańa gúlzarlar men aýlalar saltanatty túrde ashyldy.
