Otandyq qorǵanys-ónerkásip kesheniniń jetistikteri qandaı

ASTANA. KAZINFORM - Ulttyq áskerı-patrıottyq ortalyqta otandyq qorǵanys-ónerkásip kesheni kásiporyndarynyń basshylyǵymen jumys kezdesýi ótti, dep habarlaıdy QR Qorǵanys mınıstrliginiń baspasóz qyzmeti.

Jıynǵa Qorǵanys mınıstriniń orynbasary general-maıor Shaıh-Hasan Jazyqbaev tóraǵalyq etti.

Kezdesýde otandyq qorǵanys-ónerkásip kesheni men memlekettik qorǵanys tapsyrysynyń qazirgi jaǵdaıy talqylanyp, olardy qoldaý sharalary aıasyndaǵy vedomstvoaralyq ózara is-qımyldyń basym baǵyttary aıqyndaldy.

Kezdesýde taqyrypqa qatysty birqatar baıandamalar jasaldy.

Jıyndy ashqan general-maıor Shaıh-Hasan Jazyqbaev otandyq qorǵanys-ónerkásip kesheniniń aıtarlyqtaı jetistikterge qol jetkizgenin atap ótti.

– Elimizdiń qorǵanys-ónerkásip kesheni – memlekettiń áskerı qaýipsizdigin qamtamasyz etetin jáne ekonomıkanyń túrli salalarynyń damýyna serpin beretin strategııalyq mańyzdy sala. Onyń quramyna qarý-jaraq, áskerı jáne arnaıy tehnıka óndiretin kásiporyndar, sondaı-aq ǵylymı-zertteý ınstıtýttary kiredi. Búginde zamanaýı bronetehnıka úlgilerin jasaý, servıstik qyzmet kórsetý men jóndeý bazasyn damytý, halyqaralyq yntymaqtastyqty keńeıtý jáne tsıfrlandyrý baǵytynda ilgerileý bar, – dedi Qorǵanys mınıstriniń orynbasary.

Sonymen birge Qorǵanys mınıstrligi áskerı-tehnıkalyq yntymaqtastyq aıasyndaǵy aldyn ala kelisimderge súıene otyryp, otandyq kásiporyndardyń júktemesin arttyrý sharalaryn iske asyryp jatyr. Onyń ishinde ártúrli tıptegi ushqyshsyz ushý apparattaryn, radıoelektrondyq kúres quraldaryn lokalızatsııalaý boıynsha usynystar engizilýde.

Kezdesý qorytyndysy boıynsha Qorǵanys mınıstriniń orynbasary memlekettik qorǵanys tapsyrysynyń sharttaryn, olardy ýaqtyly ári sapaly oryndaý jónindegi keshendi sharalarǵa erekshe nazar aýdardy.

Osyǵan deıin qorǵanys salasyna arnalǵan ınnovatsııalyq IT alańy iske qosylǵany týraly jazdyq.