Qorǵanys mınıstrliginiń kýrsanttary halyqaralyq olımpıadadan júldemen oraldy
ASTANA.KAZINFORM - Reseı Federatsııasynyń Voronej qalasynda TMD-ǵa qatysýshy memleketter joǵary áskerı oqý oryndarynyń kýrsanttary arasynda ótken X halyqaralyq ınformatıka olımpıadasy aıaqtaldy.
Zııatkerlik saıystyń qorytyndysy boıynsha Qazaqstan quramasy úzdik úshtikke endi, dep habarlaıdy QR Qorǵanys mınıstrliginiń baspasóz qyzmeti.
Baspasózó qyzmetiniń málimetterine qaraǵanda, Radıoelektronıka jáne baılanys áskerı-ınjenerlik ınstıtýtynyń kýrsanttary halyqaralyq arenada el namysyn qorǵady. Olımpıadaǵa Qazaqstan, Ázerbaıjan, Belarýs, Reseı jáne Tájikstan elderinen alty komanda qatysty.
Úsh kezeńnen turatyn jarys ártúrli deńgeıdegi tapsyrmalardy sheshýdi qamtydy. Birinshi kezeńde qatysýshylar algorıtmdik oılaý qabiletterin kórsetse, ekinshi kezeńde aqparattyq tehnologııalar salasyndaǵy bilimderin dáleldedi. Al sońǵy kezeńde baǵdarlamalaý men júıelik taldaý elementterin biriktiretin keshendi tapsyrmalardy oryndady.
Tartysty básekege qaramastan, Qazaqstan komandasy jaqsy nátıje kórsetti. Qatysýshylar úshin otandyq áskerı oqý oryndarynda qoldanylatyn júıeden ózgeshe operatsııalyq júıeni paıdalaný qıyndyq týǵyzǵanyn aıta ketý kerek.
Komanda jetekshisi, Radıoelektronıka jáne baılanys áskerı-ınjenerlik ınstıtýty jaratylystaný-ǵylymı pánder kafedrasynyń basshysy Raýshan Igilikova atap ótkendeı, kýrsanttardyń jańa tehnıkalyq jaǵdaılarǵa tez beıimdelý qabileti sheshýshi ról atqardy.
- Barlyq kezeńderdiń qorytyndysy boıynsha Radıoelektronıka jáne baılanys áskerı-ınjenerlik ınstıtýtynyń komandasy úshinshi oryndy ıelendi. Al Reseı Federatsııasy jeńis tuǵyryna kóterilse, ekinshi oryn Belarýs Respýblıkasyna buıyrdy. Olımpıada jeńimpazdary men júldegerleri kýboktarmen, baǵaly syılyqtarmen jáne qurmet gramotalarymen marapattaldy,-delingen habarlamada.
Osyǵan deıin Qorǵanys mınıstrligi kýrsanttary baǵdarlama jasaqtaý olımpıadasynda kósh bastaǵany týraly jazǵan edik.
