Qorǵanys mınıstrliginiń avıatsııasy Abaı oblysyndaǵy órtti sóndirýge jumyldyryldy
ASTANA. KAZINFORM — Qazaqstan Respýblıkasy Qarýly kúshteri Áýe qorǵanysy kúshteriniń áskerı qyzmetshileri Abaı oblysynyń Borodýlıha aýdanynda 16 shilde kúni tutanǵan iri orman órtin sóndirýge qatysyp jatyr.
Tilsiz jaýdy aýyzdyqtaý órt qaýpiniń asa joǵary deńgeıi, aptap ystyq pen jetýi qıyn jer bederi saldarynan kúrdelene tústi. Órtpen kúreske Tótenshe jaǵdaılar mınıstrliginiń bólimshelerimen qatar Qorǵanys mınıstrliginiń kúshteri men quraldary da jumyldyryldy.
Órttiń eń kúrdeli oshaqtaryn sóndirýde sý tógý qurylǵylarymen jabdyqtalǵan armııalyq avıatsııa ekıpajdaryna úlken jaýapkershilik júkteldi. Áskerı ushqyshtar órt oshaqtaryna áýeden sý tógip, jerdegi bólimshelerdiń tıimdi jumys isteýine qolaıly jaǵdaı jasap keledi.
Qazirgi ýaqytta Áýe qorǵanysy kúshteriniń ekıpajdary órt oshaqtaryna 57 tonna bolatyn 30-dan asa márte sý tókti. Avıatsııanyń úılesimdi jumysynyń arqasynda órttiń taralý qarqyny báseńdep, jerdegi bólimshelerdiń órtti oqshaýlaýyna múmkindik týdy.
Tótenshe jaǵdaıdy joıý úshin Qorǵanys mınıstrliginiń eki Mı-17 jáne bir Mı-171Sh tikushaǵy jumyldyryldy. Olar Tótenshe jaǵdaılar mınıstrliginiń bólimshelerimen jáne basqa da tıisti qyzmettermen birlesip, órtti sóndirý, eldi mekender men orman qoryn qorǵaý jumystaryn atqaryp jatyr.
Aıta ketelik Semeı ormanyndaǵy órt 60 gektar aýmaqty sharpydy. Sonymen qatar «Semeı ormany» rezervatynda órt shyqqan soń lagerdegi 200-ge jýyq bala evakýatsııalandy. Premer-mınıstrdiń tapsyrmasymen eki mınıstr «Semeı ormanyna» attandy.
