Almatyda allergııa men tynys alý aýrýlaryna mamandanǵan ortalyqtar qurylady
ALMATY. KAZINFORM – Almatynyń №1 qalalyq klınıkalyq aýrýhanasy bazasynda allergologııa jáne pýlmonologııa baǵyttary boıynsha eki quzyret ortalyǵy qurylady.
Qalalyq qoǵamdyq densaýlyq saqtaý basqarmasynyń málimetinshe, bul qurylymdar halyq densaýlyǵyn qorǵaý júıesinde mańyzdy ról atqarady. 2025 jyly №1 qalalyq klınıkalyq aýrýhana statsıonarynda allergııalyq aýrýlardan 1926 patsıent emdelgen. Al aýrýhananyń qabyldaý bólimine bir jylda 26 059 adam júgingen. Onyń shamamen 15 myńy jedel allergııalyq reaktsııamen, al 3 myńǵa jýyǵy tynys alý músheleriniń aýrýlarymen túsken.
- Allergologııa jáne pýlmonologııa boıynsha quzyret ortalyqtary qaladaǵy medıtsınalyq uıymdarǵa ádistemelik qoldaý kórsetedi. Bul patsıentterdi baǵyttaýdyń biryńǵaı júıesin qurýǵa, kópbeıindi statsıonarlar men emhanalardyń jumysynda zamanaýı tásilder engizýge jáne Almatynyń ár aýdanynda arnaýly kómektiń qoljetimdiligin arttyrýǵa múmkindik beredi, - dep habarlady basqarmadan.
Allergologııa boıynsha quzyret ortalyǵy allergııalyq aýrýlardy erte anyqtaýǵa, zamanaýı allergodıagnostıka jáne emdeý ádisterin engizýge kómektesedi. Al pýlmonologııa boıynsha quzyret ortalyǵy bronhıaldy astmanyń, onyń ishinde aýyr túrlerin, ókpeniń sozylmaly obstrýktıvti aýrýlaryn, ınterstıtsıaldy ókpe aýrýlaryn, kovıdten keıingi jaǵdaıdy jáne tynys alý jetkiliksizdigin emdeýge joǵary tehnologııalyq kómek kórsetýge basymdyq beredi.
Eske salaıyq, buǵan deıin Almatyda №1 qalalyq perzenthana ǵımaraty súriletinin jazǵanbyz.