Qorǵanys mınıstrliginiń áskerı kolledjderine qujat qabyldaý bastaldy
ASTANA. KAZINFORM — QR Qorǵanys mınıstrliginiń qaramaǵyna kiretin tehnıkalyq jáne kásiptik bilim berý baǵdarlamalary iske asyrylatyn bes kolledjge qujat qabyldaý júrip jatyr. Bul týraly vedomstvonyń baspasóz qyzmeti málim etti.
Bular — Astana qalasyndaǵy Keńes Odaǵynyń Batyry, Halyq qaharmany, armııa generaly Saǵadat Nurmaǵambetov atyndaǵy áskerı kolledj, Shymkent qalasyndaǵy Sabyr Rahymov atyndaǵy áskerı kolledj, Aqmola oblysynyń Şýchınsk qalasyndaǵy Shoqan Ýálıhanov atyndaǵy áskerı kolledj, Qaraǵandy qalasyndaǵy Talǵat Bıgeldınov atyndaǵy áskerı kolledj jáne Almaty qalasyndaǵy Baýyrjan Momyshuly atyndaǵy áskerı-sport kolledji.
Onda 9 synyp bazasynda oqý merzimi 2 jyl 10 aı. Densaýlyq jaǵdaıy boıynsha jaramdy úmitkerler kolledjge 1-5 tamyz aralyǵynda qujattardy tapsyrý úshin keledi. Qabyldaý 5-20 tamyz aralyǵynda júzege asyrylady.
Osy kezeńde ótinish berýshiler kásibı-psıhologııalyq irikteýden, túpkilikti medıtsınalyq kýálandyrýdan, normatıvter boıynsha dene daıyndyǵyn tekserýden ótedi. Sońǵy kezeń konkýrstyq irikteý men qabyldaýdy qamtıdy.
Attestattyń ortasha baly keminde 3 bolatyn bilimi týraly qujaty bar, emhanada medıtsınalyq tekserýden ótken oqýǵa túsýshiler oqý ornyna 30 shildege deıin keledi.
Shoqan Ýálıhanov atyndaǵy áskerı kolledji 11 synyp bazasynda kásibı serjanttar daıyndaıdy. Bul jaǵdaıda oqý bir jyl 10 aıǵa sozylady.
Konkýrstan tys qabyldaý quqyǵyn áskerı qyzmet mindetterin atqarý kezinde qaza tapqan nemese múgedektik alǵan, qyzmet ótkerý kezinde habar-osharsyz ketken áskerı qyzmetshilerdiń balalary, «Altyn belgi» belgisimen marapattalǵan kandıdattar, sońǵy úsh jyldaǵy halyqaralyq olımpıadalarǵa, konkýrstarǵa qatysýshylar jáne sporttyq jarystardyń jeńimpazdary paıdalanady.
— Áskerı kolledjge qabyldaý konkýrsyn ótkizý kezinde kórsetkishter birdeı bolǵan jaǵdaıda jetim balalar men ata-anasynyń qamqorlyǵynsyz qalǵan balalardyń, áskerı daıarlyq jónindegi qosymsha baǵdarlamalary bar bilim berý uıymdarynyń túlekterine basymdyq beriledi. «Dene shynyqtyrý jáne áskerı istegi sport» mamandyǵy boıynsha áskerı-sport kolledjine oqýǵa túsý kezinde sport sheberi, sport sheberine kandıdat sporttyq ataqtary, sońǵy úsh jylda olımpıadalar men spartakıadalardyń chempıony atanǵan jastarǵa artyqshylyq beriledi, — delingen habarlamada.
Qabyldaý kezeńinde talapkerler oqý ornynyń aýmaǵyna ornalasady jáne tamaqpen qamtamasyz etiledi. Áskerı kolledjge qabyldanǵandar oqýǵa 29 tamyzǵa deıin keledi.
Aıta keteıik, bıyl 550 sheteldik azamat Qazaqstanda bilim alady.