Qorǵanys mınıstrliginiń aldynda ulttyq qorǵanystyń kıberquramdasyn damytý mindeti tur
ASTANA. KAZINFORM — Astanada avıatsııa general-leıtenanty Dáýren Qosanovtyń basshylyǵymen ótken keńeste Memleket basshysynyń Joldaýynda aıtylǵan mindetterge sáıkes qorǵanys vedomstvosynyń damý basymdyqtary aıqyndaldy. Bul týraly Qorǵanys mınıstrligi málim etti.
Keńes jumysyna Qorǵanys mınıstrliginiń basshylyǵy, Qarýly kúshter túrleriniń bas qolbasshylary, ásker tekteri men óńirlik qolbasshylyq áskerleriniń qolbasshylary, sondaı-aq departamentterdiń, bas basqarmalar men áskerı oqý oryndarynyń bastyqtary qatysty.
Mınıstr Memleket basshysynyń Joldaýynda kórsetilgen el damýynyń negizgi baǵdarlaryna toqtalyp, tsıfrlandyrý quraldary men jasandy ıntellekt tehnologııalaryn jedel engizý strategııalyq mindet ekenin erekshe atap ótti. Onyń aıtýynsha, Qarýly kúshter tehnologııalyq jańǵyrýdyń belsendi qatysýshysyna aınalýy tıis.
– Qorǵanys mınıstrliginiń aldynda tsıfrlyq sheshimderdi, jasandy ıntellekt tehnologııalaryn, avtonomdy basqarý júıelerin keńinen engizý, sondaı-aq ulttyq qorǵanystyń kıberquramdasyn damytý mindeti tur. Bolashaqta áskerimiz kúrdeli gıbrıdtik qaterlerge jaýap bere alatyn, shapshań, dál ári joǵary tehnologııaly armııa bolýy qajet, – dep atap ótti avıatsııa general-leıtenanty Dáýren Qosanov.
Qorǵanys vedomstvosynyń basshysy bıylǵy jyldyń sońyna deıin árbir áskerı bólimde jergilikti jeli qurylysyn aıaqtaýdy, al barlyq áskerı oqý oryndarynda oqý úderisin tolyq tsıfrlandyrýdy jáne jasandy ıntellektti oqytý kýrstaryn bilim berý baǵdarlamalaryna engizýdi tapsyrdy. Mınıstr kólik-logıstıka jáne qurylys salalarynda jumystyń sapasyn arttyrý jáne 3D-modeldeýdi keńinen qoldaný qajettiligine nazar aýdardy.
Áskerı medıtsınany damytý máselesine de erekshe kóńil bólindi. Jasandy ıntellekt tehnologııalaryn áskerı medıtsına salasyna da engizý qajet. Áskerı medıtsına qyzmetshilerine medıtsınalyq qyzmetterdiń sapasy men kólemin baqylaýdyń jańa júıesin qurý tapsyryldy.
Keńeste tárbıe jáne ıdeologııalyq jumys máseleleri de mańyzdy oryn aldy. Qoǵamnyń armııaǵa degen senimin nyǵaıtýǵa, quqyqtyq mádenıetti arttyrýǵa jáne áskerı qyzmetshilerdiń zamanaýı qundylyq baǵdarlaryn qalyptastyrýǵa erekshe nazar aýdarylatyn bolady.
Aıta keteıik, elimizde Qorǵanys salasyna da jasandy ıntellekt birtindep engizilýde. Máselen áskerı boryshyn óteýshilerdi irikteý JI-ge júktelip jatyr. Sondaı-aq alǵashqy áskerı tirkeýge qoıý sekildi buryn mamandar jeke-jeke qolmen toltyratyn jumystar tsıfrlyq tehnologııanyń kómegimen avtomattandyryla bastady.