Qorǵanys mınıstrliginiń 104 nysany tekserilip, 37 is qaralyp jatyr
ASTANA. KAZINFORM — Qorǵanys mınıstrliginiń qyzmetin keshendi tekserý jónindegi komıssııa aralyq qorytyndylardy usyndy. Bul týraly Aqordanyń baspasóz qyzmeti habarlady.
Memleket basshysy qurǵan komıssııa Qazaqstan Respýblıkasy Qorǵanys mınıstrliginiń qyzmetin keshendi tekserýdiń aralyq qorytyndylaryn usyndy.
Tekserý qorǵanys vedomstvosynyń 104 nysanyn qamtydy. Bıýdjet qarajatyn paıdalaný tıimdiligine aýdıt júrgizý jalǵasyp jatyr.
Komıssııa jumysy aıasynda qaýipsizdikti qamtamasyz etýge, áskerı qyzmet ótkerýge tıisti jaǵdaı jasaýǵa, azyq-túlikpen jáne kıim-keshekpen jabdyqtaýdyń, medıtsınalyq kómek kórsetýdiń sapasyna, sondaı-aq memlekettik múliktiń saqtalýyna basa nazar aýdarylyp otyr.
Anyqtalǵan jekelegen quqyq buzý derekteri boıynsha sotqa deıingi tergep-tekserý bastaldy.
Qazirgi ýaqytta qylmystyq qýdalaý organdarynyń qaraýynda 37 is bar. Tergeý múddesine baılanysty bul ister jónindegi málimetter ázirge jarııa etilmeıdi.
Tekserý «Zań jáne tártip» qaǵıdaty negizinde júrgizilýde. Onyń maqsaty — Qarýly Kúshterdiń jaýyngerlik ázirligin qamtamasyz etý jáne áskerı tártipti nyǵaıtý úshin júıeli sharalar ázirleý.
Komıssııanyń usynymdary Áskerı reforma josparyn iske asyrý barysynda da paıdalanylyp otyr.
Komıssııa jumysy bıylǵy qarashada aıaqtalady.
Aıta ketelik Mańǵystaýdaǵy qaıǵyly oqıǵaǵa baılanysty 300-den astam adamnan jaýap alynǵany týraly jazǵan edik.
