Qorǵanys mınıstrligin tekserý: 13 qylmystyq is qozǵaldy
ASTANA. KAZINFORM — Memleket basshysyna Qorǵanys mınıstrligin tekserý jónindegi komıssııa jumysynyń alǵashqy nátıjeleri týraly esep berildi. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev Qazaqstan Respýblıkasynyń Qorǵanys mınıstrligindegi isterdiń jaı-kúıine keshendi tekserý júrgizý jónindegi komıssııa múshelerimen keńes ótkizdi.
Memleket basshysy atqarylǵan jumystyń alǵashqy nátıjeleri týraly esepti tyńdady. Komıssııa tóraǵasy, Qaýipsizdik Keńesi Tóraǵasynyń orynbasary Aıda Balaeva tekseristiń negizgi baǵyttary jónindegi qorytyndyny baıandady.
Jıyn barysynda Mańǵystaý oblysyndaǵy qaıǵyly oqıǵa Qarýly kúshterde qordalanǵan júıelik problemalardy áshkerelegeni atap ótildi.
Aldyn ala tergeý nátıjesi áskerı is-sharalardy josparlaý kezinde óreskel qatelikter jiberilgenin jáne buǵan deıingi basshylyq tarapynan tıisti qadaǵalaý bolmaǵanyn kórsetti.
Memleket basshysy alǵashqy kadrlyq sheshimder qabyldanǵanyn, alaıda áskerı qyzmetshilerdiń qazasyna kináli laýazymdy tulǵalardyń barlyǵy zańǵa sáıkes jaýapkershilikke tartylýǵa tıis ekenin málimdedi. Atalǵan másele Prezıdenttiń jeke baqylaýynda bolady.
Tekseristiń birinshi kezeńiniń qorytyndysy boıynsha qylmystyq qýdalaý organdary memleket múlkin talan-tarajǵa salý, qyzmetin asyra paıdalaný faktilerine, sondaı-aq Qorǵanys mınıstrligine qarasty uıymdar men qurylymdyq bólimsheler qyzmetindegi basqa da zań buzýshylyqtarǵa qatysty 13 qylmystyq is qozǵady.
Mańǵystaý oblysyndaǵy tragedııanyń jaı-japsaryn zertteý barysynda oqý-jattyǵý jıyndaryn daıyndaý jáne josparlaý kezinde táýekelderdi baǵalaý, desant túsirýdi uıymdastyrý jáne áskerılerdiń qaýipsizdigin qamtamasyz etýge qatysty eleýli kemshilikterge jol berilgeni anyqtaldy.
Qolbasshylyq quramnyń qylmysqa parapar salǵyrttyǵy boıynsha sotqa deıingi tergeý amaldary jalǵasyp jatyr. Bes laýazymdy tulǵa tutqyndaldy. Tergeý aıaqtalǵan soń olardyń áreketine túbegeıli quqyqtyq baǵa beriledi.
Sonymen qatar áskerı tártip pen aldyn alý jumystarynda birshama kemshilik bary anyqtaldy. Áskerılerge álimjettik jasaý, jarǵyǵa qaıshy áreket etý faktileri áshkerelenip, qylmystyq ister qozǵaldy.
Qaýipsizdik talaptaryn, áskerı qyzmetti ótkerý sharttaryn saqtaý, tyldy qamtamasyz etý jáne jeke qurammen tárbıe jumysyn uıymdastyrý máselelerine aıryqsha mán berilip otyr.
Qasym-Jomart Toqaev Komıssııaǵa Qorǵanys mınıstrliginiń jańa basshylyǵymen birlesip, anyqtalǵan kemshilikterdi joıý jóninde naqty usynystar ázirleýdi tapsyrdy.
Tekseris nátıjesi Qarýly kúshterdi reformalaý josparyn daıyndaý kezinde eskerilýge tıis.
Jıynda qazirgi zamannyń syn-qaterlerine qarsy tıimdi áreket etetin jańa turpatty armııa qalyptastyrý qajettigine basa mán berildi. Jańǵyrý belgileri áskerı tártiptiń kúsheıýinen, áskerı qyzmetshilerge boryshyn óteý kezinde tıisti jaǵdaı jasaýdan jáne qaýipsizdik deńgeıiniń artqanynan baıqalýǵa tıis.
Sonymen qatar keshendi tekseris obektıvti túrde júrgizilip, áskerdiń jaýyngerlik ázirligine nuqsan keltirmeý qajettigi atap ótildi.
Qarýly kúshter qatarynda Konstıtýtsııadaǵy «Zań men tártip» qaǵıdaty múltiksiz saqtalýy kerek.
Komıssııa jumysy jalǵasyp jatyr.
Aıta ketelik Prezıdent Qorǵanys mınıstrligindegi aýqymdy aýdıtti jalǵastyrýdy tapsyrǵan edi.
