Qorǵanys mınıstrligi jasandy ıntellektti engizý jónindegi mamandandyrylǵan bólimshe qurdy
ASTANA. KAZINFORM – Qarýly kúshteri Joǵarǵy Bas qolbasshysynyń tapsyrmalaryn oryndaý sheńberinde jáne basqarý tıimdiligin arttyrý, protsesterdi ońtaılandyrý, sondaı-aq qorǵanys áleýetin kúsheıtý maqsatynda Qorǵanys mınıstrliginde jasandy ıntellekt tehnologııalaryn engizý men damytýǵa jaýapty mamandandyrylǵan bólimshe quryldy.
Jańa qurylym Qarýly kúshterdiń tsıfrlyq transformatsııasynyń negizgi elementi bolmaq. Bólimsheniń negizgi mindeti — derekterdiń úlken massıvterin taldaý, basqarýdy avtomattandyrý, jedel stsenarıılerdi modeldeý jáne qazirgi áskerı jaǵdaıda basqarý sheshimderin qabyldaý jyldamdyǵyn arttyrý úshin jasandy ıntelekt sheshimderin ázirleý jáne engizý.
Qazaqstan Respýblıkasynyń Qorǵanys mınıstri avıatsııa general-leıtenanty Dáýren Qosanov jasandy ıntellekt tehnologııalaryn armııa qyzmetine ıntegratsııalaý jańǵyrtý jolyndaǵy mańyzdy qadam bolyp tabylatynyn jáne qorǵanys salasyndaǵy álemdik úrdisterge sáıkes keletinin atap ótti.
— Bólimshe otandyq jáne halyqaralyq ǵylymı-zertteý ortalyqtarymen, jetekshi ýnıversıtettermen jáne beıindi IT-kompanııalarmen ózara is-qımyl jasaıtyn bolady. Bul tásil qorǵanys salasyna ozyq ázirlemelerdi engizip qana qoımaı, jasandy ıntellektti áskerı qoldanýdyń ulttyq mektebin qalyptastyrýǵa múmkindik beredi.
Jasandy ıntellektti engizý jónindegi bólimsheni qurý kadrlyq áleýetti damytýǵa baǵyttalǵan.
Osyǵan sáıkes, qazirgi zamanǵy algorıtmdermen jáne júıelermen jumys isteýge qabiletti ofıtser-taldaýshylar men tsıfrlyq tehnologııalar salasyndaǵy mamandardy daıarlaý josparlanyp otyr, — delingen Qorǵanys mınıstrligi habarlamasynda.
Osylaısha, Qorǵanys mınıstrligi jasandy ıntellekt ulttyq qorǵanystyń tıimdiligin, qaýipsizdigin jáne táýelsizdigin arttyrý quraly bolatyn jańa basqarý arhıtektýrasyn qalyptastyrýǵa strategııalyq qadam jasaıdy.
Aıta ketelik mektepter men kolledjderde jasandy ıntellekt tehnologııasy engiziledi.