Qorǵanys mınıstrligi jańa áskerı formanyń qansha turatynyn aıtty

ASTANA. KAZINFORM – 2024 jyldan bastap Qazaqstanda barlyq áskerı qyzmetshiler úshin biryńǵaı dalalyq kıim formasy engiziledi. Qorǵanys mınıstrligi jańa kıim úlgileri qansha turatynyn aıtty.

Vedomstvonyń habarlaýynsha, QR Qarýly Kúshterin zattaı múlikpen qamtamasyz etý Ónerkásip jáne qurylys mınıstrliginiń bıýdjeti aıasynda júrgizilip jatyr. 

«Sonymen qatar, Prezıdenttiń 2023 jylǵy 12 jeltoqsandaǵy «QR Prezıdentiniń 2011 jylǵy 25 qazandaǵy «QR Qarýly Kúshteri, basqa da áskerleri men áskerı quralymdary áskerı qyzmetshileriniń áskerı kıim nysany men aıyrym belgileri týraly» 144 jarlyǵyna ózgerister engizý týraly» 413 jarlyǵynyń 2-tarmaǵyna sáıkes, Úkimetke respýblıkalyq bıýdjette kózdelgen qarajat sheginde áskerı kıimniń eski úlgileriniń kııý merzimderin eskere otyryp, kezeń-kezeńimen sharalar qabyldaý tapsyryldy», — delingen redaktsııanyń resmı suraýyna berilgen jaýapta.

Qorǵanys mınıstrligi jańa kıim úlgilerine kóshý sebebinen bıýdjet ulǵaıtylmaıtynyn atap ótti. Qosymsha shyǵyndar qajet etilmeıdi.

Sondaı-aq, áskerı qyzmetshiler úshin kıim formasynyń erler men áıelderge arnalǵan birneshe túri qarastyrylǵan.

«Dalalyq kıim boıynsha bir jazǵy jıyntyqtyń quny 19 500 teńgeni quraıdy. Qysqy dalalyq kıim kostıými – 39 800 teńge», - deıdi mınıstrlik.

Bekitilgen jabdyqtaý normalaryna sáıkes, merzimdi qyzmettegi áskerı qyzmetshiler bir jylda jazǵy kamýflıajdy kıimniń 3 jıyntyǵyn, qysqy kamýflıajdyń 2 jıyntyǵyn alady, sondaı-aq jazǵy jáne qysqy jumys kıimderi bar.

Kıim-keshektiń tek jańasy (1 sanat) beriledi.

«Qyzmet merzimi aıaqtalǵan soń zapasqa shyǵarylatyn áskerı qyzmetshi jabdyqtaý normalarynda belgilengen tizimge sáıkes qamtamasyz etiledi, onyń ishinde bir jazǵy, bir qysqy kıim jınaǵy, maýsym boıynsha ish kıimder jıyntyǵy jáne basqalary. Kelesi áskerge shaqyrylatyn áskerı qyzmetshilerge tek qana jańa kıim-keshek, aıaq kıim, qural-jabdyqtar men ish kıimder beriledi», - dep tolyqtyrdy mınıstrlik.