Qorǵanys mınıstrligi tikushaq apatynan qaza tapqan úsh ushqyshtyń aty-jónin jarııalady
ASTANA. KAZINFORM – 12 tamyzda sý asty izdestirý jumystary barysynda ekıpajdyń úshinshi múshesiniń denesi tabyldy, dep habarlaıdy Qorǵanys mınıstrliginiń baspasóz qyzmeti.
10 tamyzda ekıpaj komandıri maıor Nurjigit Qaıratuly Úısinbaevtyń denesi tabylyp, anyqtalǵan bolatyn. Ol eskadrılıa komandıriniń (armııalyq avıatsııa) tárbıe jáne ıdeologııalyq jumys jónindegi orynbasary boldy. 1-synypty ushqyshtyń EC-145 tikushaǵyn basqarýda tájirıbesi aıtarlyqtaı, jalpy ushý ýaqyty – 930 saǵat. Joǵary kásibı daıyndyǵymen, jaýapkershiligimen, bastamashyldyǵymen jáne áskerı boryshyna adaldyǵymen erekshelengen ol áriptesteri men qolbasshylyq arasynda zor qurmetke ıe bolǵan.
11 tamyzda izdeý toptary avıatsııalyq eskadrılıa avıatsııalyq býynynyń bort tehnıgi kapıtan Baqtııar Sánıollauly Erjigitovtiń denesin tapty. 1-synypty mamannyń EC-145 tikushaǵyn basqarýda tájirıbesi jetkilikti, jalpy ushý ýaqyty – 300 saǵat. Avıatsııalyq bólimderde kóp jyldyq tájirıbe jınaqtaǵan joǵary bilikti maman, beıindik daıyndyqtan ótken.
12 tamyzda ekıpaj komandıriniń kómekshisi kapıtan Aman Nurlanuly Amangeldiniń denesi tabyldy. Tájirıbeli ushqysh, kúrdeli meteorologııalyq jaǵdaılarda birneshe márte ushyp jattyqqan. Túrli aýqymdaǵy jattyǵýlar men operatsııalarǵa qatysqan. Joǵary oryndaýshylyq tártibimen jáne minsiz qyzmettik bedelimen erekshelengen. EC-145 tikushaǵyndaǵy ushý ýaqyty – 295 saǵat.
Qaza tapqan úsh ushqysh ta Áýe qorǵanysy kúshteri áskerı ınstıtýtynyń túlekteri. Áriptesteri olardy árdaıym kómekke daıyn, qaıyrymdy jáne janashyr azamat retinde eske alady.
- Akvatorııany jáne oǵan irgeles aýmaqty zertteý boıynsha izdestirý sharalary jalǵasýda. Tikushaq bólikterin anyqtaý jáne jaǵaǵa shyǵarý jumystary júrgizilip jatyr.
Apattyń sebepterin anyqtaý úshin tergeý amaldary júrgizilýde. Qorǵanys mınıstrligi men Qarýly kúshterdiń basshylyǵy qaza tapqandardyń týystary men jaqyndaryna qaıǵyryp kóńil aıtady jáne barlyq qajetti kómekti kórsetedi, - delingen resmı aqparatta.
Aıta keteıik, buǵan deıin tikushaq apatqa ushyraǵan Sorbulaq sý qoımasynyń 50 paıyzy tekserilgeni habarlandy.