Qorǵanys mınıstrligi sý basqan aımaqtarǵa qosymsha áskerı kúshterin joldaıdy – Toqaev

ASTANA. KAZINFORM – Qazaqstan Respýblıkasynyń Prezıdenti Qasym-Jomart Toqaev eldegi sý tasqynynan zardap shekkenderge kómek retinde memlekettik materıaldyq rezervti paıdalanýdy tapsyrdy.

«Meniń buıryǵymmen apatqa qarsy kúreske Qorǵanys mınıstrligi qosymsha áskerı kúshterin joldaıdy. Halyqqa kómektesý úshin Úkimetke memlekettik materıaldyq rezervti paıdalanýdy tapsyramyn. Sondaı-aq Úkimet shyǵyndardy óteýdiń tıimdi joldaryn shuǵyl qarastyrýǵa tıis. Ony zardap shekken azamattarǵa jan-jaqty túsindirý kerek. Beriletin ótemaqy shyǵyndy tolyq jabýy qajet», — dedi Qasym-Jomart Toqaev halyqqa úndeýinde. 

Sondaı-aq, Memleket basshysy Úkimet basshysynyń orynbasarlaryna sý basqan aımaqtardy aralaýdy tapsyrdy. 

«Jaǵdaıy neǵurlym kúrdeli aımaqtardaǵy jumysty úılestirý úshin Úkimet basshysynyń orynbasarlaryna aımaqtarǵa shyǵýdy tapsyramyn. Olar ahýal túzelgenshe sol jerde bolady. Aqparattyq shtab azamattardy memleket qabyldap jatqan barlyq sharalar jóninde úzdiksiz jáne jan-jaqty habardar etip otyrýǵa tıis», — deıdi ol. 

Búgin Memleket basshysy sý tasqyny saldarynan qalyptasqan aýyr jaǵdaıǵa baılanysty úndeý joldady.