Qorǵanys mınıstrligi Saryózektegi sarbaz óliminiń yqtımal sebebin aıtty

ASTANA. KAZINFORM – Qorǵanys mınıstrligi 14 qańtarda Saryózek gornızonyndaǵy (Jetisý oblysy) sarbaz ólimine qatysty resmı túsinik berdi. 

— 14 qańtarda Saryózek kentindegi 12740 áskerı bóliminde bolǵan qatardaǵy jaýynger Dastan Qurmanbektiń ólimine qatysty túsinik bergim keledi. Atalǵan fakti boıynsha qyzmettik tergeý meniń basshylyǵymmen — Qurlyq áskerleriniń Bas qolbasshysynyń basshylyǵymen — «Ońtústik» óńirlik qolbasshylyǵy áskerleri qolbasshysynyń basqarmasy, Bas qolbasshy Basqarmasynyń ofıtserler tobynyń qatysýymen júrgizildi. Quqyq qorǵaý organdary qylmystyq is qozǵady jáne tergeý amaldary júrip jatyr, - dedi QR Qarýly kúshteri Qurlyq áskerleriniń bas qolbasshysy, general-maıor Mereke Kóshekbaev ortalyq kommýnıkatsııalar qyzmeti alańynda ótken baspasóz máslıhatynda. 

Sondaı-aq Qurlyq áskerleriniń bas qolbasshysy sarbaz óliminiń aldyn ala sebebin aıtty. 

— Qyzmettik tergeý qorytyndysy boıynsha qazanyń yqtımal sebebi qolbasshylyqtyń qaramaǵyndaǵy jeke qurammen jumys isteýde jekelegen olqylyqtardyń bolýy múmkin degen tujyrym jasadyq. Qolbasshylyq Dastannyń ishki alańdaýshylyǵyn ýaqytynda baıqaı almady, ıaǵnı oǵan moraldyq jáne psıhologııalyq qoldaý kórsetip, áskerı qyzmet jaǵdaıyna beıimdelýin anyqtaı almady, - deıdi ol. 

Osy oraıda Qorǵanys mınıstrliginiń ókili áskerı bólimderdiń qolbasshylyǵy sarbazdardyń minez-qulqyndaǵy aýytqýlarǵa dereý áreket etetinin atap ótti. 

— 8 qańtarda qatardaǵy jaýynger Dastan Qurmanbek týraly aqparat alyp, bólim komandıri onymen jeke áńgimelesti. 12 qańtarda ata-anasy bólimge keldi jáne telefonmen sóılesti. Qolbasshylyq Dastandy bosatty, ıaǵnı kúni boıy Dastan ata-anasymen birge boldy. Áskerı ujym ishindegi, onyń ishinde ofıtserler, serjanttar arasyndaǵy qarym-qatynasqa baılanysty eshqandaı problemalar bolǵan joq. Tergeý múddesine sáıkes oqıǵanyń egjeı-tegjeıin aıta almaımyn, - dep tolyqtyrdy Mereke Kóshekbaev. 

Aıta ketsek, bir apta buryn Saryózekte (Jetisý oblysy) qatardaǵy jaýynger oqý-jattyǵý kezinde mert boldy. 

Buǵan deıin áskerde sarbazdardan aqsha jınaý máselesi týraly jazǵan bolatynbyz.