Qorǵanys mınıstrligi sarbazdarǵa qatysty taraǵan beınejazbaǵa pikir bildirdi

ASTANA. KAZINFORM – QR Qorǵanys mınıstrligi áleýmettik jelide taraǵan merzimdi áskerı qyzmettegi sarbazdarǵa qatysty beınejazbaǵa túsinikteme berdi. Vedomstvo jarııalanǵan vıdeomaterıal shyndyqqa janaspaıtynyn jáne Qarýly Kúshterdiń bedeline nuqsan keltiretinin málimdedi.

Mınıstrliktiń habarlaýynsha, atalǵan beınejazba 2019 jyly áskerı bólimderdiń birinde oryn alǵan. Beınekadrda beınelengen áskerı qyzmetshilerdiń óz sózinshe, vıdeo ázil retinde, tek jeke paıdalaný úshin túsirilgen.

Qorǵanys mınıstrligi áleýmettik jeli qoldanýshylaryn burmalanǵan jáne jalǵan vıdeomaterıaldarǵa senbeýge, tek resmı derekkózderge súıenýge shaqyrdy.

Sondaı-aq qoldanystaǵy zańnamada ádeıi jalǵan aqparat taratý jáne faktilerdi burmalaý úshin jaýapkershilik kózdelgenin eske saldy.

Beınejazbanyń avtory Jomart Órken de vıdeo naqty jaǵdaıdy kórsetpeıtinin rastady. Onyń aıtýynsha, ol 2019 jyldyń sáýir aıynda Eskeldi aýdanynan áskerge shaqyrylyp, Kerbulaq aýdanynyń Saryózek qalasyndaǵy №29108 áskerı bóliminde, úshinshi batareıanyń birinshi dıvızıonynda merzimdi qyzmet ótkergen.

– Vıdeo ázil retinde, jigitterge arnap túsirilgen. Ofıtserler tarapynan kúsh qoldaný nemese azaptaý bolǵan joq. Túsirilim áskerı parkte júrgizildi, – dedi ol.

Qorǵanys mınıstrligi atalǵan beınejazbanyń konteksten julynyp alynǵanyn jáne Qarýly Kúshterdegi naqty jaǵdaıǵa qatysy joq ekenin taǵy da atap ótti.

Buǵan deıin áskerı qyzmetshiler drondardy qurastyrý men basqarýdy úırenip jatqany habarlanǵan bolatyn.