Qorǵanys mınıstrligi men Qazaqstan kúres federatsııasy yntymaqtastyq týraly memorandýmǵa qol qoıdy
ASTANA. KAZINFORM – Bul kelisim áskerı qyzmetshilerdiń dene jáne sporttyq daıarlyq júıesin damytýǵa, sondaı-aq joǵary dárejeli sportshylardy qoldaýǵa baǵyttalǵan birlesken jumysty kózdeıdi, dep habarlaıdy QR Qorǵanys mınıstrliginiń baspasóz qyzmeti.
Atalmysh qujatqa Qorǵanys mınıstri avıatsııa general-leıtenanty Dáýren Qosanov pen Qazaqstannyń grek-rım, erkin jáne áıelder kúresi federatsııasynyń tóraǵasy Erkin Oqasov qol qoıdy.
– Mundaı memorandým Qarýly kúshterdiń sporttyq áleýetin nyǵaıtýǵa jáne jastardy áskerı-patrıottyq rýhta tárbıeleýge baǵyttalǵan ózara yntymaqtastyǵymyzdyń jańa kezeńin bastaıdy. Kúsh-jigerimizdi biriktirý daryndy sportshylardyń múmkindigin ashýǵa, olardyń halyqaralyq arenada joǵary nátıjelerge qol jetkizýine qoldaý kórsetýge, sondaı-aq patrıotızmdi, tártipti jáne Otanǵa qyzmet etýdi ómirlik ustanymyna aınaldyratyn urpaq tárbıeleýge múmkindik beretinine senimdimin, – dedi Qorǵanys mınıstri.
Memorandým sporttyq kúresti damytý salasyndaǵy birlesken qyzmetti úılestirýdi, oqý-jattyǵý jıyndaryn ótkizýdi, sportshylar men mamandardyń halyqaralyq oqý-jattyǵý is-sharalaryna qatysýyn, sonymen qosa halyqaralyq áskerı-sporttyq yntymaqtastyqty keńeıtýdi kózdeıdi.
Kelisim Qazaqstan Respýblıkasy Qarýly kúshteriniń materıaldyq-tehnıkalyq bazasyn nyǵaıtýǵa da baǵyttalǵan. Atap aıtqanda, bıýdjetten tys qarajat esebinen sport nysandaryn zamanaýı kúres kilemderimen jáne arnaıy sporttyq jabdyqtarmen qamtamasyz etý qarastyrylǵan.
Sporttyq rezervti daıarlaýǵa erekshe kóńil bólinedi. 9-synypty aıaqtaǵannan keıin bolashaǵynan zor úmit kúttiretin sportshylarǵa Baýyrjan Momyshuly atyndaǵy áskerı-sport kolledjinde «erkin kúres» jáne «grek-rım kúresi» mamandyqtary boıynsha bilim alýǵa múmkindik beriledi.
Budan ózge ulttyq qurama músheleri halyqaralyq jarystar men iri sporttyq týrnırlerge daıyndyqtan qol úzbeı, Qazaqstan Respýblıkasy Qarýly kúshteriniń Sport rotasynda áskerı qyzmetin óteý múmkindigine ıe bolady.
Eki taraptyń kelisimi olımpıadalyq kúres túrlerin damytýǵa, armııa sportshylarynyń kadrlyq áleýetin nyǵaıtýǵa, otansúıgish jastardy tárbıeleýge jáne Qazaqstannyń halyqaralyq sport arenasyndaǵy bedelin odan ári arttyrýǵa baǵyttalǵan uzaq merzimdi ári ózara tıimdi áriptestikke umtylysyn aıǵaqtaıdy.
Aıta keteıik, osyǵan deıin Prezıdent Qorǵanys mınıstrine Qarýly kúshterdiń jaýyngerlik daıarlyǵyn jetildirýdi tapsyrǵan bolatyn.
