Qorǵanys mınıstrligi Kaspııde qaza tapqan áskerılerdiń jaqyndaryna kóńil aıtty

Mınıstrlik bolǵan oqıǵany búkil el úshin aýyr qaza dep atady.

– Bul – qaza tapqandardyń otbasylary men qarýlas joldastary úshin ǵana emes, búkil el úshin aýyr qaza. Otan aldyndaǵy mindetin atqarý kezinde ómirden ótken áskerı qyzmetshilerdiń otbasylarynyń qaıǵysyna ortaqtasyp, olarǵa sabyr men tózim tileımiz, – delingen Qorǵanys mınıstrliginiń kóńil aıtýynda.

Vedomstvo qaza tapqan áskerı qyzmetshilerdiń týǵan-týystary men jaqyndaryna taǵy da kóńil aıtyp, «Rýhtary peıishte shalqysyn» dep jazdy.

Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.

Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.

Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.

Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.

Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.

Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.

Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.

Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.

25 qyrkúıek Qazaqstanda jalpyulttyq aza tutý kúni bolady.