Qorǵanys mınıstrligi kýrsanttary baǵdarlama jasaqtaý olımpıadasynda kósh bastady
ASTANA. KAZINFORM – Qorǵanys mınıstrligi Radıoelektronıka jáne baılanys áskerı-ınjenerlik ınstıtýtynyń kýrsanttary respýblıkalyq baǵdarlama jasaqtaý olımpıadasynda birinshi jáne ekinshi oryndardy enshilep, barynsha daıyndalǵandaryn kórsetip, eldiń jetekshi ýnıversıtetteriniń komandalarynan senimdi túrde basyp ozdy.
Intellektýaldy jarys Almaty qalasyndaǵy Almaty tehnologııalyq ýnıversıtetiniń bazasynda ótti. Saıysqa 15 komanda qatysty. Olardyń quramynda azamattyq jáne kúshtik qurylymdardyń oqý oryndary da boldy, sonyń ishinde Halyqaralyq aqparattyq tehnologııalar ýnıversıteti, Abaı atyndaǵy Qazaq ulttyq pedagogıkalyq ýnıversıteti, sondaı-aq Ulttyq qaýipsizdik komıteti men Іshki ister mınıstrliginiń akademııalary da bar.
Olımpıada eki kezeńnen turdy. Kezeńder qatysýshylardyń teorııalyq bilimderi men praktıkalyq daǵdylaryn baǵalaýǵa baǵyttaldy. Birinshi týrda konkýrsanttar test tapsyrmalaryn oryndap, logıkalyq esepterdi jyldamdyqqa sheshti. Ekinshi kezeńde komandalar baǵdarlama jasaqtaý boıynsha praktıkalyq tapsyrmalardy oryndap, zamanaýı tilder men algorıtmdik oılaýdy shekteýli ýaqytta kórsetti.
Barlyq synaqtar qorytyndysy boıynsha birinshi oryndy podpolkovnık Rahmatýlla Shákirovtyń jetekshiligimen kýrsant Mıras Ábsalyqov pen kishi serjant Ámir Qarpyqovtyń komandasy jeńip aldy. Ekinshi oryn podpolkovnık Asqar Aıshevtiń jetekshiligimen kýrsanttar Dinmuhamed Esirkepov pen Dıas Ahmadjanovtyń komandasyna berildi.
– Mundaı jarystar tek bilimdi ǵana emes, minezdi de shyńdaıdy. Áskerı oqý ornyndaǵy daıyndyq bizge joǵary júkteme men jaýapkershilikte tıimdi jumys isteýge múmkindik beredi, - dedi ekinshi kýrs kýrsanty Mıras Ábsalyqov.
Mundaı jaqsy nátıjeler kýrsanttardyń daıyndyq deńgeıin joǵary ekenin jáne aqparattyq tehnologııalar men tsıfrlyq qaýipsizdik salasynda mamandar daıarlaýǵa baǵyttalǵan áskerı bilim berý júıesiniń tıimdiligin kórsetedi.
Eske sala keteıik, buǵan deıin áskerge shaqyrý naýqany kezinde jastarǵa myarmy.kz platformasy arqyly merzimdi qyzmetke onlaın ótinim tapsyrý múmkindigi berilgenin jazǵan edik.
