Qorǵanys mınıstrligi qazaqstandyqtarǵa aldaǵy áskerı oqý-jattyǵýlar týraly eskertý jasady
ASTANA. KAZINFORM – Qazaqstan Qorǵanys mınıstrligi 29 maýsym men 2 shilde aralyǵynda Qarýly Kúshterdiń áskerı bólimderi men mekemelerinde jaýyngerlik ázirliktiń joǵary dárejesine keltirý boıynsha keshendi taktıkalyq-saptyq sabaqtar ótetinin habarlady.
Mınıstrliktiń málimetinshe, oqý-jattyǵýlar jeke quram men bólimshelerdiń jaýyngerlik ázirliktiń joǵary deńgeıine kóshý kezindegi praktıkalyq daǵdylaryn jetildirýge baǵyttalǵan.
«Ótkiziletin is-sharalar josparly oqý sıpatynda bolady jáne negizinen áskerı bólimderdiń aýmaqtarynda jáne oqý polıgondarynda uıymdastyrylady. Osyǵan baılanysty áskerı tehnıkanyń qozǵalysy baıqalýy múmkin. Jekelegen bólimsheler oqý polıgondary men oqý ortalyqtaryna josparly marshtar jasaıdy», – dep habarlady Qorǵanys mınıstrligi.
Vedomstvonyń málimetinshe, osy kezeńde óńirlerdegi jekelegen avtojol ýchaskelerinde jol qozǵalysyna ýaqytsha shekteýler engizilýi múmkin.
«Azamattardy, áleýmettik jelilerdi paıdalanýshylardy jáne buqaralyq aqparat quraldarynyń ókilderin tek resmı aqparat kózderinde jarııalanǵan málimetterdi basshylyqqa alýǵa shaqyramyz», – delingen mınıstrlik habarlamasynda.
Aıta keteıik, Qorǵanys mınıstrligi áskerde namaz oqýǵa qatysty málimdeme jasady.
