Qorǵanys mınıstrligi: Eki matros áskerı qyzmetin jalǵastyryp jatyr
ASTANA. KAZINFORM — Qorǵanys mınıstrligi áleýmettik jelilerde merzimdi áskerı qyzmettegi matrostar Ahmetov A.A. men Maǵaýııa Á.A. týraly taralyp jatqan aqparatqa qatysty túsinikteme berdi.
Áleýmettik jelide batysqazaqstandyq sarbaz Aınar Ahmetovtiń 24 qyrkúıek kúni Kaspıı teńizindegi oqý-jattyǵýda bolyp, aman qalǵany jóninde málimet tarady. Jaýyngerdiń týysqany Dámetken Súleımenovanyń málim etkenindeı, Aınar Ashatuly Syrym aýdany Toǵanas aýylynan áskerge shaqyrylǵan.
— Ol óz kúshimen jaǵaǵa júzip shyqqan jáne qasyndaǵy joldasyna kómektesken, biraq ony alyp shyǵa almaǵan. Aınardyń ákesi ekinshi top múgedegi, anasy aýyrady, kóp balaly ana. Olar balasymen habarlasa almaı otyr. Aınar Ahmetov eshqandaı tizimde bolmaı tur. Onyń sońynan izdep baratyndaı ata-anasynyń jaǵdaıy joq, — deıdi D. Súleımenova.
Áleýmettik jelilerde merzimdi áskerı qyzmettegi matrostar A. A. Ahmetov pen Á.A.Maǵaýııa týraly taralyp jatqan aqparatqa qatysty QR Qorǵanys mınıstrligi jaýap berdi.
Mınıstrlik málimetine qaraǵanda, áskerı-teńiz kúshteri ótkizgen oqý-jattyǵý barysynda jeke quramnyń bir bóligi jaǵalaýda bolyp, tıisti oqý mindetterin oryndady.
— Merzimdi áskerı qyzmettegi matrostar A. A. Ahmetov pen Á.A.Maǵaýııa jaǵalaýda oqý mindetterin oryndaǵan áskerı qyzmetshiler tobynyń quramynda boldy. Qazirgi ýaqytta atalǵan áskerı qyzmetshiler áskerı bólimniń ornalasqan jerinde jáne kún tártibine sáıkes áskerı qyzmetin atqaryp júr. Azamattardy tekserilmegen jáne shyndyqqa sáıkes kelmeıtin aqparatty taratpaýǵa, sondaı-aq Qorǵanys mınıstrliginiń resmı málimetterine súıenýge shaqyramyz, — delingen resmı aqparatta.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
25 qyrkúıekte, saǵat 9:15 shamasynda úzdiksiz júrgizilgen izdestirý-qutqarý jumystary nátıjesinde eki sarbazdyń denesi sýdan shyǵaryldy. Osylaısha teńiz-áskerı kúshteriniń 14 áskerı qyzmetshisi qaza boldy.
Prezıdent Qorǵanys mınıstrligindegi jaǵdaıdy tekseretin komıssııa qurǵan edi. Komıssııa júrgizilgen jumystyń alǵashqy nátıjeleri týraly jeti kún ishinde baıandaýǵa tıis.
Qyzmetke salǵyrt qarady, korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustalǵan bolatyn.
26 qyrkúıekte Mańǵystaý jurty qaza tapqan sarbazdardy sońǵy saparǵa shyǵaryp saldy.
Prezıdent Dáýren Qosanovty Qorǵanys mınıstri laýazymynan bosatty. Onyń ornyna Aıdos Myrzahmetov Qorǵanys mınıstri bolyp taǵaıyndaldy.
Sonymen qatar, Memleket basshysy qaza tapqan áskerı qyzmetshilerdi memlekettik nagradalarmen marapattady. Budan bólek, áskerı oqý-jattyǵý kezinde aman qalǵan bir top áskerı qyzmetshige «Erligi úshin» medali tabystaldy.
