Qorǵanys mınıstrligi BQO-daǵy dronnyń qulaýyna baılanysty málimdeme jasady

ORAL. KAZINFORM — Qorǵanys mınıstrligi áýe keńistigin baqylaýdy kúsheıtý jáne áýe nysandarynyń memlekettik shekarany ruqsatsyz kesip ótýin boldyrmaý maqsatynda qosymsha sharalar qabyldaǵanyn málimdedi. 

— Batys Qazaqstan oblysynyń Bórli aýdanynda belgisiz ushqyshsyz ushý apparatynyń jarylysy tirkeldi. Onyń qaldyqtary eldi mekenderden alshaq aımaqta tabyldy. Zardap shekkender men materıaldyq shyǵyn tirkelgen joq, — delingen Qorǵanys mınıstrligi habarlamasynda.

Ýákiletti memlekettik organdarmen birlesip, oqıǵanyń mán-jaıyn jáne nysannyń shyǵý tegin anyqtaýǵa baǵyttalǵan tekserý is-sharalary júrgizilip jatyr.

— Qazaqstan Respýblıkasynyń Qorǵanys mınıstrligi áýe keńistigin baqylaýdy kúsheıtý jáne áýe nysandarynyń memlekettik shekarany ruqsatsyz kesip ótýin boldyrmaý maqsatynda qosymsha sharalar qabyldady. Sondaı-aq bul apparattar tıesili bolýy múmkin sheteldik seriktestermen konsýltatsııalar júrgizilip jatyr, — delingen mınıstrlik habarlamasynda.  

Aıta ketelik Batys Qazaqstanda ushqyshsyz ushatyn apparat qulaǵany týraly jazǵan edik.