Qorǵanys mınıstrligi áskerı qyzmetshilerdiń tólem tártibin jańartty
ASTANA. KAZINFORM — Qazaqstan Respýblıkasynyń Qorǵanys mınıstrligi Qarýly kúshterdiń áskerı qyzmetshilerine aqshalaı úles, járdemaqylar jáne ózge de tólemderdi tóleý qaǵıdalaryna ózgerister engizdi. Bul týraly vedomstvonyń baspasóz qyzmeti málim etti.
Tıisti buıryq 21 sáýirden bastap kúshine endi.
Túzetýler materıaldyq qamtamasyz etýdiń jekelegen normalaryn naqtylaýǵa jáne tólemderdi esepteý tártibin jetildirýge baǵyttalǵan.
Atap aıtqanda, qaǵıdalarǵa «ister men laýazymdy qabyldaý kúni» jáne «ister men laýazymdy tapsyrý kúni» degen jańa uǵymdar engizildi. Bul kúnder komandırdiń buıryǵymen bekitilip, aqshalaı úlesti esepteý kezinde qoldanylady. Jekelegen tólemderdi esepteý tártibi de naqtylandy. Máselen, áskerı qyzmetten teris sebeptermen bosatylǵan jaǵdaıda saýyqtyrýǵa arnalǵan járdemaqy endi aıdaǵy naqty kúntizbelik kúnder sanyna proportsıonaldy túrde esepteledi. Qujatta syıaqy berý tásilderi de aıqyndalǵan.
— Áskerı qyzmetshiler erekshe mańyzdy ári kúrdeli tapsyrmalardy oryndaǵany, joǵary nátıjelerge qol jetkizgeni jáne qyzmettik mindetterin úlgili atqarǵany úshin yntalandyrylýy múmkin. Syıaqylar memlekettik jáne kásibı merekelerge, sol sekildi mereıtoılyq kúnderge oraı berilýi múmkin. Mereıtoılyq jasqa 40 jas jáne odan keıingi árbir bes jyl kiredi. Ózgeristerdiń jeke bir bóligi áleýmettik qoldaýǵa arnalǵan. Áskerı qyzmetshilerge kórsetiletin materıaldyq kómektiń kólemi ulǵaıtyldy. Endi onyń mólsheri eń tómengi jalaqyǵa eselengen túrde aıqyndalady. Bul bıyl 85 000 teńgeni quraıdy, — delingen habarlamada.
Materıaldyq kómek bıýdjet qarajatynyń únemdelýi esebinen beriledi. Jaqyn týystarynyń, jubaıynyń nemese qaıyn jurtynyń qaıtys bolýy jaǵdaıynda ol eń tómengi jalaqynyń bes eselengen mólsherine deıin (425 myń teńgege deıin) jetýi múmkin. Al nekege turý, bala týý, bala asyrap alý, múliktik zalal keltirilýi nemese emdelý qajettiligi kezinde — úsh eselengen mólsherge deıin (255 myń teńgege deıin) beriledi.
Qorǵanys mınıstrliginiń málimetinshe, engizilgen ózgerister tólemder júıesiniń ashyqtyǵy men ádildigin arttyrýǵa, sondaı-aq áskerı qyzmetshilerdiń áleýmettik qorǵalýyn kúsheıtýge baǵyttalǵan.
Buǵan deıin Qorǵanys mınıstrligi áskerge shaqyrý, medkomıssııa jáne keıinge qaldyrý tártibin túsindirgen bolatyn.
