Qorǵanys mınıstrligi áskerı qyzmetshilerdiń synyptyq biliktiligin aıqyndaý tártibin bekitti

Synyptyq biliktilikti aıqyndaý Qarýly kúshterdiń áskerı qyzmetshilerine synyptyq biliktilikti berý, rastaý, saqtaý jáne tómendetý rásimderin qamtıdy.

Synyptyq biliktilik — áskerı qyzmetshiniń atqaryp otyrǵan áskerı laýazymyna sáıkes qol jetkizgen jeke daıarlyq deńgeıin sıpattaıtyn kórsetkish. Ol oqý jylynyń qorytyndy tekserýiniń (áskerı oqý oryndaryndaǵy bilim alýshylar úshin qorytyndy attestattaýdyń) nátıjeleri boıynsha aıqyndalady.

Synyptyq biliktilikti aıqyndaý Qarýly kúshterdiń árbir áskerı qyzmetshisiniń kásibı sheberligin damytýǵa yntalandyrý maqsatynda júrgiziledi.

Qarýly kúshterde mynadaı synyptyq biliktilikter belgilenedi:

Kelisimshart boıynsha áskerı qyzmet ótkerip júrgen áskerı qyzmetshilerge jáne shaqyrý boıynsha qyzmet atqaratyn ofıtserlerge:

• «3-synypty maman»;

• «2-synypty maman»;

• «1-synypty maman»;

• «1-synypty maman — tálimger (sheber)».

Áskerı oqý oryndarynyń kýrsanttary men kadetterine, sondaı-aq merzimdi áskerı qyzmetshilerge:

• «3-synypty maman».

«3-synypty maman», «2-synypty maman», «1-synypty maman», «1-synypty maman — tálimger (sheber)» synyptyq biliktilikterin berý, rastaý, saqtaý jáne tómendetý:

Qorǵanys mınıstriniń birinshi orynbasary — QR QK Bas shtabynyń bastyǵy tarapynan Qorǵanys mınıstri men Bas shtab bastyǵynyń orynbasarlaryna, Qorǵanys mınıstrligi men Bas shtabtyń qurylymdyq bólimsheleriniń áskerı qyzmetshilerine, Qarýly kúshter túrleriniń bas qolbasshylaryna, QR QK Arnaıy operatsııalar kúshteri men Desanttyq-shabýyldaý áskerleriniń qolbasshylaryna, 14776 áskerı bóliminiń komandırine, Qarýly kúshterdiń qurylymdyq bólimsheleriniń bastyqtaryna, Qazaqstan Respýblıkasynyń Ulttyq qorǵanys ýnıversıtetiniń bastyǵyna, sondaı-aq Qorǵanys mınıstrligi men Bas shtabqa baǵynysty áskerı bólimder (mekemeler) komandırleri men bastyqtaryna júzege asyrylady.

Qorǵanys mınıstriniń orynbasary — Áýe qorǵanysy kúshteriniń bas qolbasshysy tarapynan bas basqarmalar (basqarmalar) bastyqtaryna, Qarýly kúshter túrleriniń bas qolbasshylaryna, óńirlik qolbasshylyqtar áskerleri men ásker tekteriniń qolbasshylaryna, qorǵanys isteri jónindegi departamentterdiń, ortalyqtardyń, áskerı oqý oryndarynyń bastyqtaryna jáne áskerı bólimder (mekemeler) komandırlerine (bastyqtaryna) baǵynysty áskerı qyzmetshilerge qatysty júzege asyrylady.

Qorǵanys mınıstri men Bas shtab bastyǵynyń orynbasarlarynyń, Qorǵanys mınıstrligi, Bas shtab jáne Qarýly kúshterdiń qurylymdyq bólimsheleri bastyqtarynyń, Qarýly kúshter túrleri bas qolbasshylarynyń, Arnaıy operatsııalar kúshteri men Desanttyq-shabýyldaý áskerleri qolbasshylarynyń, 14776 áskerı bólim komandıriniń jáne Qazaqstan Respýblıkasynyń Ulttyq qorǵanys ýnıversıteti bastyǵynyń synyptyq biliktiligin aıqyndaý úshin Joǵary biliktilik komıssııasy taǵaıyndalady.

Joǵary biliktilik komıssııasynyń otyrysyna synyptyq biliktilik berý jónindegi materıaldardy daıyndaý men usynýdy QR QK Bas shtabynyń Jaýyngerlik daıarlyq departamenti júzege asyrady.

Qarýly kúshterdiń qalǵan áskerı qyzmetshileriniń synyptyq biliktiligin aıqyndaý úshin biliktilik komıssııasy qurylady.

Áskerı qyzmetshilerge synyptyq biliktilik mynadaı kezektilikpen beriledi:

• «3-synypty maman»;

• «2-synypty maman»;

• «1-synypty maman»;

• «1-synypty maman — tálimger (sheber)».

Synyptyq biliktilik qorytyndy tekserý (baqylaý sabaqtary, áskerı oqý oryndaryndaǵy bilim alýshylardyń qorytyndy attestattaýy) nátıjeleri boıynsha beriledi:

• «3-synypty maman» — áskerı qyzmet ótkerýdiń búkil kezeńine beriledi;

• «2-synypty maman» — kezekti biliktilik berilgennen keıin bir oqý jylynan soń;

• «1-synypty maman» — kezekti biliktilik berilgennen keıin eki oqý jylynan soń;

• «1-synypty maman — tálimger (sheber)» — kezekti biliktilik berilgennen keıin úsh oqý jylynan soń beriledi.

Osy qaǵıdalardyń 13-tarmaǵyna sáıkes synyptyq biliktiligi aıqyndalǵan áskerı qyzmetshiler úshin kelesi synyptyq biliktilikti anyqtaý kezinde aǵymdaǵy jyl tolyq oqý jyly bolyp esepteledi.

Sonymen qatar, QR QK Áskerı-teńiz kúshteriniń kemelerinde (sýdnalarynda) nemese quramanyń (bólimniń) basqarý laýazymdarynda (komandır, shtab bastyǵy, jaýyngerlik daıarlyq jónindegi komandırdiń orynbasary) kelisimshart boıynsha áskerı qyzmet ótkeretin áskerı qyzmetshiler úshin synyptyq biliktilik mynadaı tártippen aıqyndalady:

• quramany (bólimdi) basqarýshy quram úshin — quram quramyndaǵy barlyq jobadaǵy kemelerdi (sýdnalardy), sondaı-aq quramany (bólimdi) derbes basqarýǵa ruqsat alǵannan keıin;

• keme (sýdna) komandırleri men komandırdiń aǵa kómekshileri (kómekshileri) úshin — kemeni (sýdnany) derbes basqarýǵa ruqsat alǵannan keıin;

• jaýyngerlik bólimder (toptar) komandırleri, keme (sýdna) starshınalary, komandalar men bólimsheler starshınalary úshin — bólimsheni derbes basqarýǵa ruqsat alǵannan keıin;

• botsmandar men tehnıkter úshin — óz ýchaskesine derbes qyzmet kórsetýge jáne laýazymdyq mindetterin oryndaýǵa ruqsat alǵannan keıin.

Tolyǵyraq myna jerden tanysýǵa bolady.

Buıryq 2026 jylǵy 20 maýsymnan bastap qoldanysqa engiziledi.

Aıta keteıik, bıyl áskerı joǵary oqý oryndaryn úzdik bitirgen túlekterge áskerı ataq berý tártibi ózgerdi.