Qorǵanys mınıstrligi áskerı qyzmetshiler arasyndaǵy ólim-jitimniń negizgi sebebin atady
ASTANA. KAZINFORM – Sońǵy tórt jylda Qarýly kúshterde 40 sýıtsıd oqıǵasy tirkelgen. Bul týraly Májilis depýtattarynyń saýalyna Qorǵanys mınıstriniń orynbasary general-maıor Baqytbek Sydyqovtyń jaýabynda aıtylǵan.
«Sońǵy úsh jylda Qarýly kúshterde jarǵydan tys qatynastardan bolatyn qylmystardyń sany 43 paıyzǵa (40-tan 23-ke), al bıyl merzimdi áskerı qyzmetshiler arasyndaǵy sýıtsıd 67 paıyzǵa (3-ten 1-ge) tómendegen. Sizder keltirgen 270 ólim-jitimniń Qarýly kúshterde 140 oqıǵasy oryn alǵan. Olarǵa syrqattaný, jol-kólik oqıǵalary, sýıtsıd, qaýipsizdik sharalaryn buzý jáne turmystyq jaǵdaılar sebep bolǵan. Qalǵan 130 oqıǵa basqa kúshtik qurylymdarda tirkelgen. Olardyń qatarynda Qorǵanys mınıstrliginen basqa Tótenshe jaǵdaılar mınıstrligi, Shekara qyzmeti, Ulttyq ulan jáne Memlekettik kúzet qyzmeti bar. Sonymen qatar, 86 sýıtsıd faktileri de barlyq kúshtik qurylymdarǵa tıesili. Naqtyraq aıtsaq, sońǵy tórt jylda Qarýly kúshterde 40 sýıtsıd oqıǵasy tirkelgen», - dedi mınıstr orynbasary jaýabynda
General-maıordyń dereginshe, atalǵan 40 sýıtsıd oqıǵasynyń barlyǵy boıynsha qylmystyq is qozǵalǵan. 34 oqıǵa boıynsha qylmystyq ister óndirispen aıaqtalyp, protsestik sheshimder qabyldanǵan. Tergeý barysynda ózin-ózi óltirýge deıin jetkizý belgileri anyqtalmaǵan. Osyǵan baılanysty, qylmystyq ister qylmystyq quqyq buzýshylyq quramynyń bolmaýy sebebinen toqtatylǵan.
«Qabyldanǵan protsestik sheshimderdiń zańdylyǵy qadaǵalaýshy organmen (prokýratýra) tekserilgen jáne kelisilgen. Sonymen qatar, qazirgi kezde 6 oqıǵa boıynsha sotqa deıingi tergep-tekserýler jalǵasýda. Naqty sebepter men mán-jaılar tergeý qorytyndysy boıynsha anyqtalatyn bolady. Qylmystyq-protsestik zańnamaǵa sáıkes qylmystyq quqyq buzýshylyqtyń osy túri boıynsha sotqa deıingi tergep-tekserý QR ІІM áskerı-tergeý organdarymen júrgiziledi. Tergeý barysy Bas áskerı prokýratýramen qadaǵalanady. Qorǵanys mınıstrliginiń tergeý barysyna aralasýǵa nemese yqpal etýge ókilettigi joq», - dedi Baqytbek Sydyqov.
