Qorǵanys mınıstrligi áskerge shaqyrý tártibi men oǵan qatysty zańsyzdyqtar týraly eskertti

ASTANA. KAZINFORM - Áleýmettik jelilerde «áskerden qaldyrý» nemese «aq bılet» alyp berý boıynsha qyzmet kórsetý jarnamasy taratylyp jatyr. Osyǵan baılanysty Qorǵanys mınıstrligi merzimdi áskerı qyzmetke shaqyrýdy keıinge qaldyrý nemese odan bosatý týraly sheshim Qazaqstan Respýblıkasynyń zańnamasyna sáıkes tek shaqyrý komıssııasy tarapynan qabyldanatyn túsindiredi.

QR Qorǵanys mınıstrligi baspasóz qyzmetiniń habarlaýynsha, áskerge shaqyrý máseleleri boıynsha zańgerlik keńes berý – zańdy qyzmet. Alaıda medıtsınalyq qujattardy qoldan jasaý, jalǵan dıagnozdardy rásimdeý jáne áskerı qyzmetten jaltarýdyń ózge de zańsyz tásilderi deldaldar úshin de, shaqyrylýshylardyń ózderi úshin de qylmystyq jaýapkershilikke ákep soǵady.

Vedomstvo azamattardy kúmándi shemalarǵa qatyspaýǵa jáne jergilikti áskerı basqarý organdary (áskerı komıssarıattar) nemese medıtsınalyq komıssııalar arqyly «máseleni sheship berýge» kepildik beremiz dep, azamattardy jańylystyratyn «áskerı komıssarıattardyń kómekshileriniń» aıla-sharǵylaryna aldanbaýǵa shaqyrady.

Áskerı qyzmetti ótkerý – ár azamattyń konstıtýtsııalyq boryshy. Merzimdi qyzmet jastarǵa bilim berý jeńildikteri men granttar alý, kásibı daǵdylardy meńgerý, dene daıyndyǵyn nyǵaıtý sekildi naqty múmkindikter beredi. Bul – tártiptiń, jaýapkershilik pen erliktiń mektebi.

Sonymen qatar, merzimdi áskerı qyzmet ótkerý kezinde jáne qyzmetten bosatylǵannan keıin eki aı ishinde áskerı qyzmetshiler úshin kredıttik demalys (nesıelik kanıkýl) tetigi qoldanylady. Belgilengen merzimdi tolyq ótegen azamattarǵa bilim berý jeńildikteri usynylady. Sonyń ishinde olarǵa stýdenttik jataqhanadan oryn alýǵa da basym quqyq beriledi. Sondaı-aq joǵary oqý ornyna UBT tapsyrmaı-aq bilim berý grantyn alý múmkindigi qarastyrylǵan. Búgingi tańda elimizdiń joǵary oqý oryndarynda tegin bilim alýǵa arnalǵan sertıfıkattar merzimdi áskerı qyzmet ótkergen 9 myńnan astam qazaqstandyqqa berildi.

- Azamattardy merzimdi qyzmetke shaqyrý Qazaqstan Respýblıkasy Prezıdentiniń Jarlyqtary men qoldanystaǵy zańnamaǵa sáıkes júrgiziledi. Ony uıymdastyrýǵa jergilikti atqarýshy organdar jaýapty, al shaqyrylýshylardyń tizimin qalyptastyrý jáne shaqyrý qaǵazdaryn tabystaýdy jergilikti áskerı basqarý organdary qamtamasyz etedi, - delingen habarlamada.

Sondaı-aq onda azamattardyń shaqyrý komıssııasynyń shaqyrý qaǵazy boıynsha jergilikti áskerı basqarý organdaryna kelýge mindetti ekeni aıtylǵan. Ony jeke tabystaý múmkin bolmaǵan jaǵdaıda azamattardyń kelýin ishki ister organdary qamtamasyz etedi.

Medıtsınalyq tekserýdi jergilikti densaýlyq saqtaý organdarynyń mamandary ótkizedi. Olar azamattyń áskerı qyzmetke jaramdylyq sanatyn anyqtaıdy. Zańdy negizder bolǵan jaǵdaıda merzimdi áskerı qyzmetti keıinge qaldyrý nemese odan bosatý múmkindigi beriledi, al basqa jaǵdaılarda azamattar merzimdi áskerı qyzmetke jiberiledi.

18-den 27 jasqa deıingi, keıinge qaldyrý nemese bosatý quqyǵy joq er azamattar áskerge shaqyrylady. Shaqyrý jylyna eki ret – naýryzdan maýsymǵa deıin jáne qyrkúıekten jeltoqsanǵa deıin júrgiziledi.

Qorǵanys mınıstrligi azamattardy óz quqyqtaryn júzege asyrý úshin tek zańdy tetikterdi paıdalanýǵa shaqyrady.

Osyǵan deıin mınıstrlik áskerge óz erkimen kelip jatqan jastardyń qarasy qalyń ekeni týraly aıtty.