Qorǵanys mınıstrligi áskerge shaqyrý, medkomıssııa jáne keıinge qaldyrý tártibin túsindirdi
ASTANA. KAZINFORM – Qazaqstanda árbir áskerge shaqyrý naýqany birneshe kezeńnen turady. Oǵan shaqyrtý qaǵazyn alý, medıtsınalyq tekserýden ótý jáne keıinge qaldyrý múmkindikterin qarastyrý kiredi.
Qorǵanys mınıstrliginiń málimetinshe, shaqyrtý qaǵazy – azamatty jergilikti áskerı basqarý organyna shaqyratyn resmı qujat. Ol áskerge shaqyrý úderisiniń bastalýyn bildiredi jáne ony oryndaý zań talaptaryna sáıkes mindetti.
- Shaqyrtý birneshe tásilmen beriledi. Qujatty azamatqa qol qoıdyrý arqyly jeke tapsyrýǵa, jumys berýshi nemese oqý orny arqyly jetkizýge bolady. Sonymen qatar eGov.kz portalynyń jeke kabıneti, eGov Mobile qosymshasy jáne SMS habarlama arqyly jiberý tártibi de engizilgen. Bul norma 2025 jyldan bastap zańdy kúshine endi.
Qujatta kelý kúni, ýaqyty jáne mekenjaıy kórsetiledi. Belgilengen ýaqytta dáleldi sebepsiz kelmegen jaǵdaıda ákimshilik jaýapkershilik qarastyrylady. Al shaqyrtýdan júıeli túrde jaltarý qylmystyq jaýapkershilikke ákelýi múmkin, - delingen aqparatta.
Shaqyrtý alǵan azamat eń aldymen qujattaǵy derekterdiń durystyǵyn tekserýi tıis. Atap aıtqanda, aty-jóni, mekenjaıy, kelý kúni jáne shaqyrý maqsaty naqty kórsetilýi qajet.
Sonymen qatar aldyn ala qajetti qujattardy daıyndaý usynylady. Olardyń qataryna jeke kýálik, tirkeý kýáligi (bar bolsa), bilim týraly qujattar nemese oqý ornynan anyqtama, medıtsınalyq qorytyndylar jáne keıinge qaldyrýǵa negiz bolatyn qujattar kiredi.
- Eger azamat belgilengen ýaqytta kele almasa, ol jergilikti áskerı basqarý organyn aldyn ala habardar etip, sebebin rastaıtyn qujat usynýy qajet. Mysaly, syrqattanǵan jaǵdaıda medıtsınalyq anyqtama, al oqý nemese jumysqa baılanysty bolsa tıisti qujattar talap etiledi, - dep jazdy mınıstrlikten.
Aıta keteıik, shaqyrtý qaǵazy azamatty birden áskerge jiberýdi bildirmeıdi. Bul rásim ádette derekterdi naqtylaý, medıtsınalyq tekserýden ótý, jaramdylyq sanatyn anyqtaý jáne keıinge qaldyrý negizderin tekserý maqsatynda júrgiziledi.
Aıta keteıik, Gvardeısk garnızonynda 600 sarbaz áskerı-eseptik mamandyqty meńgerdi.
