Qorǵanys mınıstrligi áskerge kúshtep áketý týraly: Shaǵym bolsa, polıtsııaǵa aıtý kerek

ASTANA. KAZINFORM – Qorǵanys mınıstriniń orynbasary Shaıh-Hasan Jazyqbaev Májilis kýlýarynda áskerge shaqyrý tártibin ózgertetin zań ázirlenip jatqanyn málim etti.

- Biz, Qorǵanys mınıstrligi, shaqyrý ýaqytyn aıaqtadyq. Qajetti áskerı qyzmetshiler bizde tolyqtyryldy. Qazir júrip jatqan naýqan – Іshki ister mınıstrliginiń Ulttyq ulan qataryna jınap jatqan is-sharalar, - dedi ol.

Mınıstr orynbasary bul máselege keshendi túrde qaraý kerek dep esepteıtinin aıtty.

- Qazir zań jobasyn qarap jatyrmyz. Shaqyrý jumystaryn, júıesin zańǵa ózgerister engizý arqyly ornyna keltirý jumystary júrgizilip jatyr. Zań jobasy Senatqa ótti. Sol zań shyǵý kerek. Shaqyrý júıesinde SMS-arqyly ádis qoldanylady. SMS keledi, habarlamany alǵan soń ol jigit óz aıaǵymen áskerı komıssarıatqa kelmese, aıyppul tóleıdi. Biz osy ýaqytqa deıin Qazaqstan azamattaryna zań júzinde aıyppul da salǵan joqpyz. Jazaǵa da tartqan joqpyz. Biraq shaqyrý naýqany ýaqytyly ótip jatyr, - deıdi Shaıh-Hasan Jazyqbaev.

Sondaı-aq, ol jas jigitterdi áskerden qashpaýǵa shaqyrdy.

- Áskerden qoryqpaý kerek. Áskerı daıyndyqtan ótý kerek. Ýaqyty kelgen kezde, beti aýlaq, Otandy qorǵaýǵa daıyn bolý kerek. Biz Qorǵanys mınıstrligimiz. Quqyq qorǵaý organy emespiz. Eger qandaı da bir zań buzylsa, Іshki ister mınıstrligi men prokýratýra bar. Sol jaqqa shaǵym jasaý kerek. Eger sizderde osyndaı ýaqytta osyndaı zańdy buzdy deseńizder, biz óz tarapymyzdan hat joldap, qylmystyq is qozǵaýǵa túrtki bolamyz, - dedi ol.

Eske salsaq, áleýmettik jelide shetelde oqyp júrgen qazaqstandyq stýdentti áskerılerdiń kósheden alyp ketýi daý týǵyzǵan bolatyn.