Qorǵanys mınıstrligi: áskerge kúshtep áketý áreketi bolsa, sotqa júginý múmkindigi bar

ASTANA. KAZINFORM – Qorǵanys mınıstriniń birinshi orynbasary Sultan Qamaletdınov jastardy áskerge kúshtep áketý is-qımyldaryna pikir aıtty.

– Ókinishke qaraı, mundaı faktiler boldy. Buǵan jol berýge bolmaıdy. Sonymen birge, bizdiń elde Prezıdent «zań pen tártip» túsinigin aıqyndady. Qazaqstan Respýblıkasy Konstıtýtsııasynyń 36-babynda «erikti túrde» degen uǵym joq, onda memleketti qorǵaý - árbir azamatynyń qasıetti paryzy jáne mindeti degen naqty jazylǵan. Osy oraıda áskerge shaqyrylǵandar osyny oryndaýǵa mindetti. Al eger oryndamasa, zań normalary bul azamatqa qatysty bolýy kerek, - dedi Sultan Qamaletdınov Senattyń jalpy otyrysynan keıin tilshiler suraǵyna jaýap bere otyryp.

Sondaı-aq mınıstrdiń orynbasarynan áskerge kúshtep alyp ketetinderge qatysty qoldanylyp jatqan sharalar týraly suraldy.

– Barlyq júrgizilgen tekserýler boıynsha, eger azamat óz quqyǵy buzyldy dep eseptese, bizde quqyqtyq memleket – onyń sotqa júginýge quqyǵy bar. Men Qorǵanys mınıstriniń birinshi orynbasary retinde óz ókilettigimdi júzege asyrǵan kezeńde, mundaı jaǵdaılar bolǵan joq, – dedi ol.

Buǵan deıin habarlanǵandaı, Sultan Qamaletdınov keıbir jastar ne sebepti áskerge barǵysy kelmeıtini týraly suraqqa jaýap berdi.