Qorǵanys mınıstrligi: Artyq bıýrokratııa joıylyp, turǵyn úı alý tártibi jeńildeıdi
ASTANA.KAZINFORM - Búginde Qorǵanys mınıstrligi qyzmetkerler men áskerı qyzmetshilerdiń qyzmettik turǵyn úı alý nemese turǵyn úı tólemderin ıelený quqyqtaryn saqtaıtyn túzetýler tetigin ázirlegen. Bul tetikter erejelerde naqty kórsetilmek.
Qorǵanys mınıstrliginiń málimetinshe Astanada avıatsııa general-leıtenanty Qorǵanys mınıstri Dáýren Qosanovtyń tóraǵalyǵymen «Turǵyn úı qatynastary týraly» zańǵa engiziletin ózgeristerge qatysty vedomstvoaralyq keńes ótti.
Qorǵanys mınıstrligi usynǵan túzetýler áskerı qyzmetshilerdi turǵyn úımen qamtamasyz etý júıesin jeńildetýge jáne onyń ashyqtyǵyn arttyrýǵa baǵyttalǵan.
Talqylaýǵa barlyq kúshtik qurylymnyń, Ádilet, Ulttyq ekonomıka jáne qarjy mınıstrlikteriniń, Bas prokýratýranyń, Qarjy monıtorıngi agenttiginiń jáne basqa da memlekettik organdardyń ókilderi qatysty.
— Búgingi kezdesý «Turǵyn úı qatynastary týraly» zańǵa engizilgen ózgeristerden týyndaǵan ózekti máseleler boıynsha biryńǵaı sheshim qabyldaý qajettiligine baılanysty uıymdastyryldy. Bul másele tek Qarýly kúshterge ǵana emes, barlyq memlekettik organǵa qatysty, — dep atap ótti Qorǵanys mınıstri óz sózinde.
Mınıstrdiń aıtýynsha, búginde Qorǵanys mınıstrligi qyzmetkerler men áskerı qyzmetshilerdiń qyzmettik turǵyn úı alý nemese turǵyn úı tólemderin ıelený quqyqtaryn saqtaıtyn túzetýler tetigin ázirlegen. Bul tetikter erejelerde naqty kórsetilmek.
— Biz tek qoldanystaǵy turǵyn úımen qamtamasyz etý júıesin saqtap qana qoımaı, ony barynsha túsinikti ári ádil etýdi maqsat etýdemiz. Artyq bıýrokratııany joıamyz, daýly tustardy naqtylaımyz, sonda ár áskerı qyzmetshi óz quqyǵyn jáne tólem alý tártibin anyq biledi. Bul tek áleýmettik emes, moraldyq másele, adam erteńine senimdi bolsa, ol qyzmetin jan-tánimen atqarady, — dedi mınıstr.
Budan ózge túzetýler kúshine engenge deıin barlyq tólem men turǵyn úı berý qoldanystaǵy erejelerge saı júzege asyrylady.
— Áleýmettik shıelenisti azaıtý maqsatynda mınıstrlik aýqymdy túsindirý jumystaryn júrgizip jatyr. Garnızondarda aqparattyq-túsindirý toptary qurylyp, áskerı bólimderde kezdesýler ótkizip, áskerı qyzmetshilerdiń suraqtaryna onlaın túrde jaýap berýde jáne jańa ózgeristerdi túsindirip jatyr. Áskerı qyzmetshiler men olardyń otbasylaryna jedel qoldaý kórsetý úshin qaýyrt jeli men InInstagram-daǵy Kz_Army_Shanyraq akkaýnty ashyldy, onda eń ózekti suraqtarǵa jaýaptar jarııalanyp turady, — delingen mınıstrlik habarlamasynda.
Aıta ketelik keshe «Áskerı baspana» baǵdarlamasy qaıta iske qosylatyny týraly jazǵan edik.