Qorǵanys mınıstrligi áleýmettik jelide taraǵan málimdemeni joqqa shyǵardy
ASTANA. KAZINFORM – QR Qorǵanys mınıstrligi áleýmettik jelilerde mınıstr Daýren Qosanovtyń atynan taratylǵan beınemálimdemeniń jalǵan ekenin málimdedi.
Vedomstvonyń túsindirýinshe, áleýmettik jelilerde elimizdiń áýe keńistigi arqyly áýe kemeleriniń ushyp ótýine qatysty mınıstrdiń resmı málimdemesi retinde usynylǵan beınerolık taralýda.
«Atalǵan beınematerıal – jalǵan. Vıdeo jasandy ıntellekt tehnologııalaryn (deepfake) paıdalaný arqyly jasalǵan, al daýys burynǵy suhbat negizinde qurastyrylǵan. Taratylyp jatqan aqparat shyndyqqa sáıkes kelmeıdi jáne qorǵanys vedomstvosynyń resmı ustanymyn bildirmeıdi», – delingen mınıstrlik habarlamasynda.
Mınıstrlik málimetinshe, ondaǵy daýys buryn jazylǵan jarııa sózderdiń negizinde montajdalǵan.
«Buqaralyq aqparat quraldarynyń ókilderi men áleýmettik jeli paıdalanýshylaryn tek resmı derekkózderge senýge jáne tekserilmegen málimetterdi taratpaýǵa shaqyramyz», – dep atap ótti Qorǵanys mınıstrligi.
Vedomstvo qoldanystaǵy zańnamaǵa sáıkes kórineý jalǵan aqparat taratý jaýapkershilikke ákep soǵatynyn eske saldy.
Buǵan deıin Qorǵanys mınıstrligi áskerge shaqyrý tártibi men oǵan qatysty zańsyzdyqtar týraly eskertken bolatyn.