Qorǵanys mınıstrligi áleýmettik jelide taraǵan beınerolıkke qatysty túsinikteme berdi

ASTANA. KAZINFORM — Qorǵanys mınıstrligi áleýmettik jelilerde áskerı qyzmetshige qatysty zańsyz áreketter beınelengen vıdeorolıktiń taralýyna baılanysty túsinikteme berdi. 

Áleýmettik jelilerde áskerı qyzmetshige qatysty zańsyz áreketter beınelengen vıdeorolıktiń taralýyna baılanysty tómendegini habarlaımyz.

— Atalǵan beınematerıal — «Qyrǵyzfılm» kınostýdııasy túsirgen «Batken» kórkem fılminiń úzindisi jáne Qazaqstan Respýblıkasynyń Qarýly Kúshterine eshqandaı qatysy joq. Rolıkke qazaq tilindegi dybysjol jasandy ıntellekttiń dıpfeık tehnologııasy arqyly júktelgen.

BAQ ókilderi men áleýmettik jeli qoldanýshylaryn tekserilmegen aqparatty taratpaýǵa jáne tek resmı derekkózderge senýge shaqyramyz. Jalǵan aqparat taratqany úshin qylmystyq jaýapkershilik qarastyrylǵanyn eskertemiz, — delingen mınıstrlik habarlamasynda.

Aıta ketelik áskerı qyzmetshilerge qoldaý kórsetetin AI-sulu Telegram-boty iske qosylǵan edi.