Qorǵanys mınıstri sý tasqynymen kúresken áskerı qyzmetshilerge alǵys aıtty
ASTANA. KAZINFORM – Telekópirge Batys Qazaqstan, Atyraý, Aqtóbe jáne Soltústik Qazaqstan oblystaryndaǵy eldi mekender men ınfraqurylym nysandaryn sý tasqynynan qorǵaý jumystaryna tartylǵan sarbazdar, serjanttar men ofıtserler qatysty.
Búginde sý tasqynyna qarsy is-sharalarǵa Qarýly kúshterdiń «Ońtústik», «Astana», «Shyǵys», «Batys» óńirlik qolbasshylyqtary áskerı bólimderiniń, Desanttyq-shabýyldaý áskerleriniń, aýmaqtyq qorǵanys brıgadalarynyń, RHBQ bólimsheleriniń áskerı qyzmetshileri jáne áskerı ınjenerler qatysyp jatyr.
Tabandylyq ári moraldyq kúsh-jigerdi qajet etetin mundaı syndarly jaǵdaıǵa alǵash tap bolǵan sarbazdar úshin mınıstrdiń úndeýi mańyzdy boldy.
— Bıyl elimizdiń kóptegen óńirleri tabıǵı apattan zardap shekti. Alǵashqy kúnnen bastap qarýly kúshter toby tótenshe jaǵdaıdyń saldaryn joıýǵa belsendi qatysyp keledi. Іs-sharalarǵa ushqyshtar, ınjenerler, saperler, dárigerler, RHBQ áskerı qyzmetshileri jáne basqa da mamandar jumyldyrylǵan, — dedi general-polkovnık Rýslan Jaqsylyqov.
Ol sondaı-aq, ótken jyly áskerı qyzmetshiler TJM jáne basqa da kúshtik vedomstvolardyń mamandarymen birge kúrdeli jaǵdaıda orman órtin sóndirýge úlken úles qosqanyn atap ótti. Endi olar eldi mekenderdi tasqyn sý basýynan qorǵap, keletin zııandy azaıtýǵa jáne jergilikti turǵyndarǵa tabıǵı apatty jeńýge kómektesip jatyr.
— San ǵasyrlar boıy qazaq halqy el basyna qaýip tóngende birliktiń arqasynda kez kelgen qıynshylyqty eńsere bilgen. Búginde tarıhı sebepterge baılanysty Qazaqstanda júzden astam etnos ókilderi ómir súrip, eńbek etýde. Qazaqstandyqtardyń qıyn sátte bir-birin qoldaı bilýi bizge árqashan kúsh berip, erteńgi kúnge degen senimimizdi oıatady. Qoıylǵan mindetterdi oryndaý kezinde jeke batyldyqtaryńyz ben adaldyqtaryńyz úshin alǵys aıtamyn, — dep atap ótti Qorǵanys mınıstri.
Óz kezeginde 31775 áskerı bóliminiń merzimdi qyzmettegi qatardaǵy jaýyngeri Ilıa Kýzmın qıyn sátte sarbazdar elge qoldan kelgen kómegin aıamaıtynyn alǵa tartty.
— Soltústik Qazaqstan oblysyna biz Qaraǵandydan keldik. Biz úshin ózimizdi tekseretin naǵyz sát endi týdy. Bul eshqandaı oqý-jattyǵý emes, adamdar tap bolǵan naqty synı jaǵdaı. Sondyqtan olarǵa kómektesý úshin bar kúshimizdi salamyz, — dedi.
«Astana» ÓńQ-da áskerı qyzmet ótkerip júrgen sarbazdar Soltústik Qazaqstan oblysynan shaqyrylǵan. Sondyqtan eldi mekenderdi topan sýdan qorǵaý mindetine olar erekshe jaýapkershilikpen qarap, jerlesterine kómektesýge bar kúshin saldy.
Telekópir barysynda Qorǵanys mınıstri laıyqty ul tárbıelegeni úshin sarbazdardyń ata-analaryna alǵysyn jetkizdi. Ol barlyq áskerı qyzmetshilerge shydamdylyq pen tózimdilik tilep, turaqty ornalasqan oryndaryna aman-esen oralýǵa tilektestigin jetkizdi.