Qorǵanys mınıstri resmı saparmen Birikken Arab Ámirlikterinde boldy

ASTANA. KAZINFORM – Birikken Arab Ámirlikteriniń astanasy Ábý-Dabıde qorǵanys vedomstvosynyń basshysy general-polkovnık Rýslan Jaqsylyqov bastaǵan Qazaqstannyń áskerı delegatsııasy kelissózder júrgizip, qorǵanys-ónerkásip keshenderi kásiporyndarynyń ónimderimen tanysty.

Sapar aıasynda BAÁ vıtse-prezıdenti Mansýr ıbn Zaıd Ál Nahaıanmen hattamalyq kezdesý ótti. Onda qorǵanys salasyndaǵy ekijaqty ózara is-qımyldyń perspektıvalary talqylandy.

Sonymen qatar Armııa úıinde general-polkovnık Rýslan Jaqsylyqov pen qorǵanys isteri jónindegi memlekettik mınıstr Muhammed ben Múbarak Fadel ál-Mazrýı ózara múddeli yntymaqtastyq baǵyttaryn talqylady.

BAÁ qorǵanys-ónerkásip kesheni kásiporyndarynyń qyzmetimen tanysý maqsatynda qazaqstandyq delegatsııa Tawazun Industrial park ındýstrııalyq parkinde boldy. Onda áskerı maqsattaǵy ónimder shyǵaratyn «Nımr», «Karakal», «Halkon» jáne «Adası» kompanııalary jumys isteıdi.

Áskerı qyzmetshiler áskerı tehnıka men qarý-jaraqtyń taktıkalyq-tehnıkalyq sıpattamalaryn zerdeledi. Olardyń qataryna jaýyngerlik saýytty mashınalar, atys qarýy, joǵary dáldiktegi basqarylatyn jáne túzetiletin avıatsııalyq bomba, tikushaq tıpti ushqyshsyz ushý apparattary jáne joǵary qashyqtyqtaǵy tosqaýyldaýshy oq-dáriler kiredi.

Bul Qazaqstan tarıhyndaǵy Qorǵanys mınıstriniń Birikken Arab Ámirlikterine alǵashqy resmı sapary ekenin aıta ketý kerek.

Aıta keteıik, Qorǵanys mınıstri budan bylaı Sporttyq jáne jaýyngerlik sambo federatsııasyn basqarady.