Qorǵanys mınıstri paradqa daıyndyqty tekserdi
ASTANA. KAZINFORM — Qorǵanys mınıstri Rýslan Jaqsylyqov Uly Otan soǵysyndaǵy Jeńistiń 80 jyldyǵyna arnalǵan áskerı sherýge daıyndyq júrip jatqan ındýstrıaldy qalashyq pen dalalyq lagerge bardy.
Qurlyq áskerleriniń bas qolbasshysy general-maıor Mereke Kóshekbaev mınıstrge jeke quram men tehnıkanyń daıyndyǵy týraly baıandady.
— Bólek jattyǵýlar aıaqtalýǵa jaqyn. 25 sáýirden bastap sherýge qatysýshylar jaýyngerlik tehnıka men avıatsııa qatysatyn birlesken jattyǵýlarǵa kirisedi. Al 3 jáne 5 mamyrdaǵy negizgi daıyndyq Qazaq eli alańynda ótedi, — dedi general-maıor Mereke Kóshekbaev.
Qorǵanys mınıstri jeke quram men mehanıkalandyrylǵan lekterdiń ótýin qadaǵalady. Vedomstvo basshysy áskerı sherýge qatysýshylarǵa alǵysyn bildirdi.
— Búgin sizder elimizdiń Qarýly kúshteri úshin mańyzdy sharaǵa qatysýǵa daıyndalyp jatyrsyzdar. Áskerı sherý jaı ǵana is-shara emes, onyń róli Qazaqstan armııasynyń jaýyngerlik dástúrleri men elimizdiń mádenı murasyn saqtaý úshin mańyzdy. Qazaqstanda ákeleri men atalary maıdanǵa ketpegen birde-bir otbasy joq. Sizderdiń búgingi eńbekterińiz — HH ǵasyrdaǵy eń qandy soǵysta erlikpen qaza tapqan ata-babalarymyzǵa degen qurmet, — dedi Rýslan Jaqsylyqov áskerı qyzmetshilerge sóılegen sózinde.
Sonymen birge, mınıstr jaýapty tulǵalarǵa sanıtarlyq-epıdemıologııalyq normalardy, jylý rejımin saqtaý, jeke quram úshin joǵary kalorııaly tolyq tamaqtanýdy qamtamasyz etý jáne dala lagerinde tártiptiń joǵary deńgeıin saqtaý qajettigin eskertti.
Aıta keteıik, Uly Otan soǵysyndaǵy Jeńistiń 80 jyldyǵyna arnalǵan áskerı parad 7 mamyrda Astananyń basty alańynda ótedi. Oǵan 4 myńnan astam áskerı qyzmetshi, 300-den asa qarý-jaraq pen áskerı tehnıka, onyń ishinde Uly Otan soǵysy kezindegi áskerı tehnıkanyń úlgileri men maıdandyq, armııalyq jáne áskerı-kóliktik avıatsııasynyń 60-tan astam áýe kemesi qatysady.
Buǵan deıin Qorǵanys mınıstrliginiń áskerı qyzmetshisi Tımýr Erjanov Uly Otan soǵysyndaǵy Jeńistiń 80 jyldyǵyna oraı 80 shaqyrym marafon júgirip shyqqan edi. Bul júgiristi áskerı qyzmetshi maıdanda qaza tapqan batyrlar men kózi tiri ardagerlerge arnady.