Qorǵanys mınıstri Ózbekstanda ótken áskerı-patrıottyq jarys júldegerlerin marapattady
ASTANA. KAZINFORM – Astanada qorǵanys vedomstvosynyń basshysy avıatsııa general-leıtenanty Dáýren Qosanov Shyrshyq qalasynda ótken «Vatanparvarlar» áskerı-sporttyq jarysyna qatysýshylarmen kezdesti. Bul týraly Qorǵanys mınıstrliginiń baspasóz qyzmeti habarlady.
Avıatsııa general-leıtenanty Dáýren Qosanov Semeı qalasynan elordaǵa kelgen «Abaı qyrandary» áskerı-patrıottyq klýbynyń tárbıelenýshilerin quttyqtady.
– Sizderdiń jetistikterińiz tek sporttyq nátıje emes, ol – jaýapkershilik pen tabandylyqtyń, erik-jiger men patrıotızmniń aıǵaǵy. Sol arqyly el bedelin kóterip, jas urpaqqa úlgi boldyńyzdar. Abaı týǵan qasıetti jerden shyqqan jastardyń rýhy myqty, Otanǵa adal ári básekede jeńiske jete alatynyn dáleldedińizder, - dedi ol.
Óz kezeginde «Jas sarbaz» áskerı-patrıottyq qozǵalysy fılıalynyń tóraǵasy, Shákárim atyndaǵy № 5 kópbeıindi gımnazııanyń oqytýshysy Serik Túsipov pen «Abaı qyrandary» komandasynyń kapıtany Oljas Qalıjarov sóz alyp, Qorǵanys mınıstrliginiń basshylyǵyna rızashylyǵyn jetkizdi.
Áskerı-patrıottyq klýb tárbıelenýshisi Qorǵanys mınıstrine kórsetken senimi men jarysqa daıyndyq barysynda jan-jaqty qoldaýy úshin alǵys bildirdi.
«Vatanparvarlar» áskerı-sporttyq jarysyna Ázerbaıjan, Belarýs, Qazaqstan, Qyrǵyzstan, Tájikstan, Reseı jáne Ózbekstan elderiniń ókilderi qatysty.
«Abaı qyrandary» klýbynyń tárbıelenýshileri áskerı-qoldanbaly estafeta, arqan tartý jáne shyǵarmashylyq saıysta úzdik nátıje kórsetti. Sonymen qatar olar myltyqtan atý, beltemirde tartylý, AK-74 avtomatyn bólshektep-jınaý saıystarynda ekinshi oryn ıelendi. Al alǵashqy medıtsınalyq kómek kórsetý kezeńinde úshinshi orynǵa turaqtady.
Óńirdegi áskerı-patrıottyq jumysty joǵary deńgeıde uıymdastyrǵany úshin Qorǵanys mınıstri «Abaı qyrandary» komandasynyń jetekshisi Serik Túsipovti vedomstvolyq «El qorǵany» medalimen marapattady.
Sonymen qatar Abaı oblysynyń Qorǵanys isteri jónindegi departamenti baǵaly syılyqtarmen marapattaldy. Al «Abaı qyrandary» komandasynyń kapıtany Oljas Qalıjarovqa estelik qol saǵat tabystaldy. Jarysqa qatysýshylardyń bárine alǵys hattar tabys etildi.
Halyqaralyq jarysta qol jetkizgen nátıjeler «Jas sarbaz» qozǵalysy tárbıelenýshileriniń joǵary daıyndyq deńgeıin jáne elde júrgizilip jatqan áskerı-patrıottyq jumystyń tıimdiligin aıqyn kórsetti.
Eske salsaq, buǵan deıin habarlaǵanymyzdaı, Qorǵanys mınıstrligi áskerı qyzmetshilerdiń tólem tártibin jańartty.
