Qorǵanys mınıstri otandyq kásiporyndarynyń basshylarymen damý basymdyqtaryn talqylady
ASTANA. KAZINFORM – Qorǵanys vedomstvosynyń basshysy general-polkovnık Rýslan Jaqsylyqov 2024 jyly memlekettik qorǵanys tapsyrysynyń oryndalýyn qorytyndylaı kele, Qarýly kúshterdi jaraqtandyrý salasyndaǵy basymdyqtarǵa toqtaldy. Bul týraly mınıstrliktiń baspasóz qyzmeti habarlady.
Іs-sharaǵa Ónerkásip mınıstrliginiń laýazymdy tulǵalary men otandyq kásiporyndar basshylary qatysty. Brondy dóńgelekti mashınalar shyǵaratyn «Qazaqstan Paramaýnt Injınırıng», trenajerlardy, ımıtatorlardy, polıgon jabdyqtaryn jáne «Qalqan-7» – praktıkalyq oqtaryn, qosalqy bólshekterdi jáne áskerı maqsattaǵy kerek-jaraqtardy shyǵaratyn «Almatyenergoservıs» seriktestikterimen ózara tyǵyz is-áreket jasalǵany atap ótildi.
Brondy tanktiń jáne artıllerııalyq tehnıkany jóndeýmen aınalysatyn «VostokPolımerSnab» jáne «VostokRemStroıMontaj», qosalqy bólshekter, qurastyrýshy jáne rezeńke tehnıkalyq buıymdardy óndiretin «Semeı ınjınırıng» AQ-nyń zaýytaralyq kooperatsııasynyń sátti jumysy da úlgi retinde keltirildi.
Qorǵanys mınıstri ónerkásiptegilerdi vedomstvonyń ishki múmkindikterinen habardar etti. Qarýly kúshterde jóndeý-qalpyna keltirý áskerı bólimderi qurylmaq. Tehnıkalyq bólimsheler áýe qozǵaltqyshtaryn jóndeýdi júzege asyrady, artıllerııalyq júıeler qalpyna keltiriledi.
– Biz Prezıdenttiń qorǵanys-ónerkásip keshenderi kásiporyndaryna qoldaý kórsetý týraly tapsyrmasyn oryndaımyz. Óıtkeni Qarýly kúshter men qorǵanys-ónerkásip kesheniniń áleýetin nyǵaıtý – ulttyq qaýipsizdik máselesi. Bul ortaq mindetimiz. Degenmen biz ónimderi sapaly jasalatyn óndirýshilermen ǵana jumys isteýge nıettimiz, – dedi ol.
Kezdesý sońynda Qorǵanys mınıstri Qarýly kúshterdiń qajettilikterin jáne qazirgi zamanǵy soǵys qımyldarynyń úrdisterin eskerý qajettigin atap ótti. Ol memlekettik qorǵanys tapsyrysynyń sharttaryn, olardy uzartý múmkindiginen bólek, ýaqytyly jáne sapaly oryndaý jónindegi keshendi sharalarǵa erekshe nazar aýdardy.
Shyǵarylatyn ónimniń baǵasyna qatysty Qorǵanys mınıstri onyń qunyn tómendetý jóninde sharalar qabyldaý kerek dedi. Shyǵarylatyn ónim nomenklatýrasyn keńeıtý jáne ımportty almastyrý maqsatynda mınıstr ónerkásiptik kooperatsııa múmkindikterin tıimdi paıdalanýdy usyndy.
Qorǵanys mınıstri Sporttyq jáne jaýyngerlik sambo federatsııasyn basqaratynyn jazǵan bolatynbyz.