Qorǵanys mınıstri laýazymdy sheneýnikterdiń qaısylary balalaryn áskerge jibergenin aıtty
Qorǵanys mınıstri Rýslan Jaqsylyqov joǵary laýazymdaǵy sheneýnikterdiń balalaryn áskerge barýyn mindetteý múmkindigine qatysty pikir bildirdi, dep habarlaıdy Kazinform.
Búgin Májilistiń jalpy otyrysynda palata depýtattary mınıstrden joǵary laýazymdaǵy sheneýnikterdiń balalaryn áskerdegi qyzmetke shaqyrtýdy mindetteý múmkindigi týraly zańnama normasyn engizý jaıynda surady.
«Uldaryn áskerge jibergender bul jaıynda kópshilikke jarııalamaıdy. Bul turǵyda patrıottar óz áreketin barshaǵa málimdemeıdi. Osy taqyryp boıynsha burynǵy Іshki ister mınıstri Qalmuhanbet Qasymovty úlgi retinde keltirgim keledi. Ol kisi eki inisin alyp kelip, ásker qataryna qosty. Burynǵy senator Muhtar Qul-Muhammedtiń uly mektep bitirgennen keıin merzimdi áskerı qyzmettegi boryshyn ótep, qazir AQSh áskerı ýchılışesiniń kýrsanty atandy. Mınıstrler men depýtattardyń uldaryn bólekteıtin mundaı talaptyń maǵynasy joq, zań bárine birdeı», - dedi R. Jaqsylyqov.
Sonymen qatar mınıstr tilshiler suraǵyna jaýap berý kezinde óz ulyn da áskerge jiberetinin aıtty.
«Qazir ol joǵary oqý ornynda oqyp jatyr, 20 jasqa toldy. Oqýyn bitirgennen keıin, ony mindetti túrde ásker qataryna jiberemin», - dedi R. Jaqsylyqov.
Aıta keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine rezervtegi qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
