Qorǵanys mınıstri Qyzylorda oblysyndaǵy áskerı nysandardyń jaı-kúıimen tanysty
ASTANA. KAZINFORM – Qorǵanys mınıstri avıatsııa general-leıtenanty Dáýren Qosanov jumys saparymen Qyzylorda oblysyna baryp, óńirdegi áskerı basqarý organdarynyń qyzmetimen jáne áskerı bólimderdi tekserdi. Bul týraly Qorǵanys mınıstrliginiń baspasóz qyzmeti habaralady.
Oblystyq aýmaqtyq qorǵanys brıgadasynda mınıstr komandırdiń aǵymdaǵy jaǵdaı týraly baıandamasyn tyńdap, 99215 áskerı bóliminiń shtab jumysyna, sondaı-aq jeke quramnyń ornalasý jáne tamaqtaný jaǵdaılaryna tekserý júrgizdi.
Qorǵanys isteri jónindegi departament pen qalalyq basqarmada mınıstrge jergilikti atqarýshy organdarmen birlesip ótkizilgen kúzgi áskerge shaqyrý naýqanynyń qorytyndylary jáne zapastaǵy áskerı qyzmetshilerdi daıarlaý barysy týraly baıandaldy. Sonymen birge, áskerı mekemelerdiń aǵymdaǵy jóndeý jumystary aıaqtalyp, jańartylǵan ǵımarattaryna erekshe nazar aýdaryldy.
66597 áskerı bóliminde qorǵanys vedomstvosynyń basshysy shtabtyń jumysyn baǵalap, kazarma men ashanany aralap, sarbazdarmen áńgimelesti, sondaı-aq áskerı qyzmetshilerdiń áleýmettik-turmystyq jaǵdaılarymen tanysty. Sonymen birge derbes barlaý polkiniń zymyran-artıllerııalyq qarý-jaraq qoımasy men jaýyngerlik mashınalar parkiniń jaǵdaıyna aıryqsha kóńil bólindi.
Sapar qorytyndysy boıynsha Qorǵanys mınıstri bólimshelerdiń jaýyngerlik ázirligi men urysqa qabilettiligin arttyrýǵa, qyzmet etý jaǵdaılaryn jaqsartýǵa jáne jeke quramnyń joǵary moraldyq rýhyn saqtaýǵa baǵyttalǵan naqty tapsyrmalar berdi.
Budan buryn Astanada Qorǵanys mınıstrliginiń áskerı gospıtali jańa jabdyqtarmen tolyqqanyn habarlaǵanbyz.