Qorǵanys mınıstri Qatardaǵy halyqaralyq festıvalge qatysýshylarǵa alǵys bildirdi
ASTANA. KAZINFORM – Qarýly kúshterdiń Ulttyq áskerı-patrıottyq ortalyǵynda qorǵanys vedomstvosynyń basshysy avıatsııa general-leıtenanty Dáýren Qosanov Dohada ótken I halyqaralyq áskerı mýzyka jáne marshtar festıvaline qatysýshylarmen kezdesti. Bul týraly Qorǵanys mınıstrliginiń baspasóz qyzmeti habarlady.
Qazaqstandyq ujymnyń túrli alańda óner kórsetýi Qatardyń Ulttyq kúni merekesi kezinde kórermenderdiń ystyq yqylasyna ıe bolyp, mádenı is-sharany uıymdastyrýshylar tarapynan joǵary baǵasyn aldy.
– Festıval barysynda Ulttyq áskerı-patrıottyq ortalyq qyzmetshileri men Qurmet qaraýyl rotasynyń jeke quramy patrıottyq ánder, sahnalyq kórinister jáne ulttyq naqyshtaǵy óner arqyly elimizdiń rýhanı murasyn sheteldik kórermenderge tanyta bildi. Bul Qarýly kúshterimizdiń tek qaýipsizdiktiń kepili ǵana emes, sonymen qatar el mádenıetiniń rýhanı aınasy ekenin taǵy bir márte dáleldedi. Mundaı jetistikter Qazaqstan Qarýly kúshteriniń halyqaralyq arenadaǵy bedelin arttyrýǵa úles qosady, - dedi Qorǵanys mınıstri avıatsııa general-leıtenanty Dáýren Qosanov.
Іs-shara barysynda QR Qarýly kúshteri Ulttyq áskerı-patrıottyq ortalyǵynyń bastyǵy Arman Ásenov pen Qurmet qaraýyl rotasynyń komandıri aǵa leıtenant Jeńisbek Raqymjan Qorǵanys mınıstriniń alǵys hatymen marapattaldy.
Festıvalge elimizden Ortalyq áskerı orkestr, bı toby, folklorlyq-etnografııalyq ansambl jáne Qorǵanys mınıstrliginiń Qurmet qaraýyl rotasy qatysty. Qazaqstandyq áskerı qyzmetshiler kontserttik baǵdarlamadaǵy repertýary men ulttyq naqyshy arqyly erekshelendi. Onda Nurǵısa Tilendıevtiń, Temirhan Qojabekovtiń, Baqytjan Jelderbaevtyń shyǵarmalary, sondaı-aq «Allah Ya Omri Qatar» patrıottyq áni oryndaldy.
Eske sala keteıik, budan buryn Qazaqstannyń áskerı mýzykanttary qatarlyqtardyń júregin jaýlaǵanyn jazǵan edik.