Qorǵanys mınıstri Qarýly Kúshterdi jańǵyrtý jospary týraly baıandady

ASTANA. KAZINFORM — Qorǵanys mınıstri Aıdos Myrzahmetov Prezıdent Qasym-Jomart Toqaevqa Qarýly Kúshterdi jańǵyrtý jospary týraly baıandady.

Qorǵanys mınıstri Qarýly Kúshterdi jańǵyrtý jospary týraly baıandady
Foto: Aqorda

Aqordanyń baspasóz qyzmetiniń habarlaýynsha, Qarýly Kúshterdiń jańa aqparattyq-kommýnıkatsııalyq strategııasyn qabyldaý, sondaı-aq Konstıtýtsııadaǵy «Zań men tártip» qaǵıdatyna saı tárbıe jumystarynyń sapasyn arttyrý reformanyń mańyzdy baǵyttarynyń biri bolmaq.

— Atalǵan sharalar ásker qataryndaǵy tártip pen qoǵamnyń armııaǵa degen senimin nyǵaıtýǵa baǵyttalǵan. Josparda kózdelgen uıymdastyrý sharalary osy jyldyń sońyna deıin, al negizgi tujyrymdamalyq sharalar kelesi jyly iske asyrylady, — delingen habarlamada.

Jıyn barysynda Qaýipsizdik Keńesiniń Tóraǵasy Qorǵanys mınıstrliginiń qyzmetin keshendi tekserý jónindegi komıssııanyń jumysyn jyl sońyna deıin aıaqtaýdy tapsyrdy.

Prezıdent áskerı qaýipsizdik búkil memleketke ortaq mindet ekenin, sondyqtan barlyq múddeli organnan úılesimdi jumys isteý talap etiletinin eskertti.

Otyrys qorytyndysy boıynsha Áskerı reforma jospary maquldandy.

Memleket basshysy josparlanǵan ózgeristerdi ýaqtyly ári tolyq júzege asyrý óte mańyzdy ekenin atap ótti.

Jospardyń oryndalýyn úılestirý mindeti Úkimet pen Qaýipsizdik Keńesine júkteledi.

Eske salaıyq, munyń aldynda Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótkenin jazǵan edik.

Otyrysta Qaýipsizdik Keńesi Tóraǵasynyń orynbasary Aıda Balaeva áskerdi jasaqtaýdyń halyqaralyq tájirıbesin, urys qımyldaryn júrgizýdiń zamanaýı tásilderin jáne otandyq mamandardyń usynystaryn eskere otyryp ázirlengen Jospardyń negizgi erejelerin tanystyrdy.