Qorǵanys mınıstri qara jamylǵan otbasylarǵa kóńil aıtty
ASTANA. KAZINFORM — Mańǵystaý oblysynda Qazaqstan Respýblıkasynyń Qorǵanys mınıstri avıatsııa general-leıtenanty Dáýren Qosanov oqý-jattyǵý barysynda oqý-jaýyngerlik mindetti oryndaý kezinde qaza bolǵan áskerı qyzmetshilerdiń otbasylaryna bardy. Bul týraly vedomstvonyń baspasóz qyzmeti málim etti.
Kezdesýler qaraly kóńil-kúıde ótti. Mınıstr qaza bolǵandardyń týǵan-týystary men jaqyndaryna shynaıy ári tereń kóńil aıtty. Ol orny tolmas qazaǵa baılanysty otbasylardyń qaıǵysyna ortaq ekenin jetkizdi. Mınıstr jaqyndarynan aıyrylǵan otbasylardyń qaıǵysyn eshbir sózben jeńildetý múmkin emes ekenin atap ótti.
— Olar biz úshin jaı ǵana áskerı qyzmetshiler emes — bizdiń qarýlastarymyz, uldarymyz ben baýyrlarymyz. Olardyń qazasy — barsha Qarýly kúshter úshin orny tolmas aýyr qaza. Biz týǵan-týystary men jaqyndarynyń qaıǵysyna ortaqtasyp, osy qıyn kezeńde olarmen birge bolamyz, — dedi Qorǵanys mınıstri.
Meırambek Berdihanov, Azamat Mádihan jáne Dastan Begeı Jańaózen qalasynan, Mıras Turdybekuly Jetibaı aýylynan merzimdi áskerı qyzmetke shaqyrylǵan bolatyn.
Qyzmet ótkerý barysynda olar ózderin jaýapty ári tártipti áskerı qyzmetshiler retinde tanytyp, áskerı boryshtaryn adal atqardy.
Mınıstr otbasylardy Qorǵanys mınıstrligi olardy qaıǵymen jalǵyz qaldyrmaıtynyna sendirdi. Olarǵa jan-jaqty kómek pen qajetti qoldaý kórsetiledi. Vedomstvo týyndaǵan máselelerdi sheshýge járdemdesýdi jalǵastyryp, otbasylarmen turaqty baılanysta bolady.
Qaza bolǵan áskerı qyzmetshilerdiń esimi týǵan-týystary men jaqyndarynyń, qarýlastarynyń jáne barsha Qarýly kúshter jeke quramynyń júreginde máńgi saqtalady. Olardyń ómiri men áskerı boryshyna degen adaldyǵy eshqashan umytylmaıdy.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Áskerı qyzmetshilerdiń qaza bolýyna baılanysty qyzmetine salǵyrty qaraǵan birqatar laýazymdy tulǵa kúdikke ilindi.
Búgin úzdiksiz júrgizilgen izdestirý-qutqarý jumystary barysynda buǵan deıin iz-túzsiz joǵalǵan eki áskerı qyzmetshiniń — serjant Mansur Gýmarov pen matros Mıras Turdybekulynyń denesi tabyldy.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
Qorǵanys mınıstri, avıatsııa general-leıtenanty Dáýren Qosanov kináli tulǵalar jaýapkershilikten jaltarmaıtynyn aıtty.
Sondaı-aq, qaza bolǵan áskerı qyzmetshilerdiń otbasylaryna jınalǵan qarajatty arnaıy komıssııa bóledi.
