Qorǵanys mınıstri áskerı qyzmet qaýipsizdigi men tártipti kúsheıtýdi tapsyrdy
ASTANA. KAZINFORM — Almatydaǵy Qurlyq áskerleriniń áskerı ınstıtýtynda avıatsııa general-leıtenanty Dáýren Qosanovtyń tóraǵalyǵymen vedomstvonyń keńeıtilgen alqa otyrysy ótti. Jıyn 2026 jylǵy qysqy oqý kezeńiniń qorytyndysyna arnaldy.
Qorǵanys mınıstri áskerlerdiń jaýyngerlik, jumyldyrý daıyndyǵy men jaýyngerlik qabiletin, olardyń tehnıkalyq jabdyqtalýyn, sondaı-aq basqarý jáne daıyndyq protsesterin tsıfrlandyrýdy odan ári jetildirý qajettigin atap ótti.
Ol sondaı-aq, armııany zamanaýı qarý-jaraqpen jáne áskerı tehnıkamen, ásirese áýe shabýylyna qarsy qorǵanys júıelerimen, ushqyshsyz basqarylatyn apparattarymen, artıllerııamen, zymyran keshenderimen jáne oq-dárilermen jaraqtandyrý, sonymen qatar áskerler men qorǵanys-ónerkásip kesheni kásiporyndarynda tehnıkany jóndeý qarqynyn arttyrý basym baǵyt ekenin atap ótti.
Qorǵanys vedomstvosynyń basshysy áskerdegi qyzmettik tártipti kúsheıtý, kadr saıasatyn jetildirý, áskerı qyzmetshilerdi áleýmettik qamsyzdandyrýdy jaqsartý jáne áskerı qyzmettiń qaýipsizdigin qamtamasyz etý qajettigine de toqtaldy.
Qysqy oqý kezeńindegi áskerlerdiń jaýyngerlik jáne jumyldyrý ázirligi týraly Qorǵanys mınıstriniń birinshi orynbasary — Bas shtab bastyǵy general-leıtenant Qanysh Ábýbákirov baıandady. Ol jeke quramdy oqytý ádistemesindegi jańa tásilderdi ortaǵa saldy. Budan basqa jaýyngerlik daıarlyq baǵdarlamasynyń túbegeıli qaıta qaralǵanyn, onyń ishinde biryńǵaı atys kýrsy men jalpyáskerı pánder boıynsha jańa normatıvter ázirleýdi, komandırlik daıyndyq formatyn jańartýdy jáne «Bes qarý» baǵdarlamalyq modýlin engizýdi kózdeıtin josparlardy aıtty.
Qorǵanys mınıstriniń tárbıe jáne ıdeologııalyq jumystar jónindegi orynbasary general-maıor Asqar Mustabekovtiń baıandamasy profılaktıkalyq jumystardy uıymdastyrýdaǵy júıeli tásilderge, tártipti nyǵaıtý, áskerı qyzmet qaýipsizdigi jáne áskerlerdi moraldyq-psıhologııalyq turǵydan qamtamasyz etý máselelerine arnaldy.
Áskerdiń tehnıkalyq jaraqtalýy týraly Qorǵanys mınıstriniń qarý-jaraq jáne áskerı tehnıka jónindegi orynbasary general-maıor Shaıh-Hasan Jazyqbaev baıandama jasady. Ol tehnıkany jaýyngerlik daıyn kúıde ustaýdy, ony «Batyl toıtarys-2026» oqý-jattyǵýyna sapaly daıyndaýdy, sondaı-aq qarý-jaraq pen oq-dárilerdiń qaýipsiz saqtalýyn qamtamasyz etýdi basym mindet retinde atap ótti.
Alqa otyrysynyń qorytyndysy boıynsha Qorǵanys mınıstri áskerlerdiń jaýyngerlik qabileti men ázirligin odan ári arttyrý, qarý-jaraq pen tehnıkany uqypty ustaý, motoresýrstar men oq-dárilerdi tıimdi jumsaý, Qarýly kúshterdiń aqparattyq-kommýnıkatsııalyq ınfraqurylymyn damytý jóninde birqatar mindetter qoıdy.
Jıyn sońynda Qorǵanys mınıstri alqa otyrysyna deıin Almaty jáne Qonaev garnızondarynyń polıgondarynda basqarýshy qurammen ótken oqý-ádistemelik jıyndardyń mazmunyna baǵa berdi.
Aıta keteıik, Qazaqstan áskeri urys qımyldarynyń jańa formatyna beıimdelip jatyr.
