Qorǵaljynda anyqtalǵan sibir shybyny túrli ınfektsııa taratýy múmkin - Ańsaǵanym Zeınıeva
KÓKShETAÝ. QazAqparat - Aqmola oblysynyń Qorǵaljyn aýdanynda sibir gnýsy anyqtaldy, dep habarlaıdy QazAqparat tilshisi aýdandyq taýarlar jáne kórsetiletin qyzmetterdiń sapasy men qaýipsizdigin baqylaý basqarmasynyń basshysy mindetin atqarýshy Ańsaǵanym Zeınıevaǵa silteme jasap.
Basqarma basshysynyń aıtýynsha, 2019 jyly Aqmola oblysynyń zoo-parazıtologııa toby Qorǵaljyn aýdanynda júrgizgen entomologııalyq zertteý kezinde sibir gnýsyn anyqtady.
«Bul shybynnyń shaǵýy allergııalyq reaktsııa beredi jáne túrli ınfektsııa taratýy múmkin», - deıdi ol.
Vedomstvodan atap ótkendeı, ony tereń zertteý úshin 2020 jyldyń mamyr aıynda Qorǵaljyn aýdanynyń ákimdigi Semeı qalasynyń Sh.Qudaıberdıev atyndaǵy Semeı memlekettik ýnıversıtetimen kelisimshart jasady. Shyǵysqazaqstandyq entomolog ǵalymdar 2020 jyldyń maýsym aıynda jumysty bastaýdy josparlaǵan edi. Koronavırýs ınfektsııasyna oraı engizilgen karantındik shekteýge baılanysty bul jumystardyń qashan júrgiziletin ázirge belgisiz.
«Ǵalymdar Qorǵaljyn aýdanynda sibir gnýsynyń tabıǵı ortasyn, sondaı-aq olarǵa qarsy qoldanylatyn dızenfektsııalyq preparattardy anyqtaýdy josparlap otyr. Áýeli ǵalymdar zerttep almaıynsha, eshqandaı shara qoldanylmaıdy. Tek zertteý qorytyndysy boıynsha ǵana aýmaqtyq basqarma jergilikti atqarýshy organdarǵa dızenfektsııalaý jumystaryn júrgizý úshin qarjy surap júgine alady. Qazir bul másele baqylaýda. Osy jaǵdaıǵa baılanysty barlyq ózgeristerdi turǵyndarǵa aıtyp otyramyz»,- dep tolyqtyrdy vedomstvodan.
