Qorǵaljyn qoryǵynda zańsyz qus atqandar ustaldy
KÓKShETAÝ. QazAqparat – Aqmola oblysynyń «Qorǵaljyn» memlekettik ulttyq tabıǵı qoryǵynyń aýmaǵynda zańsyz qus atqan brakonerler ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, Aqmola oblystyq PD tabıǵatty qorǵaý polıtsııasynyń bólimshesi jáne «Qorǵaljyn» memlekettik ulttyq tabıǵı qoryǵynyń qyzmetkerleri birlesip, qoryq aýmaǵynda zańsyz ańshylyqpen aınalysqan tórt er adamdy qolǵa túsirdi. Ustalǵandardan qarý, oq dári jáne atylǵan 16 qus tárkilendi.
«2019 jyldyń 29 tamyzynda Qorǵaljyn aýdandyq PB kezekshilik bólimine qoryq qyzmetkerleri habarlasyp, qoryq aýmaǵynda belgisiz bireýlerdiń zańsyz qus aýlap júrgenin aıtty. Sol jerge jetken tabıǵatty qorǵaý polıtsııasynyń qyzmetkerleri men qoryq ınspektorlary Nur-Sultan jáne Şýchınsk qalalarynyń 23 jáne 63 jas aralyǵyndaǵy 3 turǵynyn ustady. Qolǵa túskenderdiń barlyǵy zańsyz ańshylyq jasaǵanyn moıyndady. Olardan qarý, oq dári jáne atylǵan 16 úırek alyndy», - deıdi vedomstvodan.
Qazirgi kezde QR QK 337 baby «zańsyz ańshylyq» boıynsha qylmystyq is qozǵalyp, sotqa deıingi tergeý amaldary júrgizilýde. Sonymen qatar, brakonerlerden «eshqaıda ketpeý» týraly qolhat alyndy.
Vedomstvonyń málimetinshe, jalpy, 2019 jyldyń basynan beri polıtsııa qyzmetkerleri tabıǵatty qorǵaý zańnamasynyń buzylýyna qatysty 330 quqyqbuzýshylyqty anyqtady. Onyń ishinde 162 oqıǵasy ańshylyq erejesine, 170 balyq aýlaýǵa qatysty. Ekologııalyq qylmysqa qatysty 49 qylmystyq is qozǵalsa, onyń 10-y zańsyz ańshylyq úlesinde.
