Qorǵaljyn qoryǵynda kıik sany úsh esege kóbeıdi
QORǴALJYN. QazAqparat – Bıyl Qorǵaljyn memlekettik tabıǵı qoryǵynda kıik sany úsh esege artty. Bul týraly qoryq dırektorynyń orynbasary Janat Jurtbaev málim etti, dep habarlaıdy QazAqparat tilshisi.
«Quryqtyń qurylǵanyna 50 jyldan asty. Jalpy aýmaǵy 700 myń gektardy quraıdy. Munda balyqtyń 15 túri, qustyń 357, ósimdiktiń 443, jándikterdiń 700 jáne jan-janýarlardyń 45 túri mekendeıdi. Onyń ishinde negizgi mekendeıtin kıik, qaban, qasqyr men túlki. Qoryqty mekendeıtin jan-janýarlar men qustardyń barlyǵy birdeı qorǵaýda, sonyń ishinde kıiktiń orny bólek. Bıyl kıiktiń ósimi jaqsy, óıtkeni tóldeýi sátti boldy, ár eshki 2 laqtan tóldedi. Naqty aıtsaq, 2018-2019 jyldary bizdiń qoryqta 15-18 myń kıik bolsa, bıyl olardyń sany 45 myńǵa deıin jetti, ıaǵnı úsh esege deıin artyp otyr», -dedi J. Jurtbaev.
Onyń aıtýynsha, qoryq aýmaǵynda sońǵy eki jylda kıik atýǵa qatysty brakonerlik oqıǵa tirkelmegen.
«Bul adamdardyń túsiniginiń ózgerýi jáne zańdy kúsheıtýmen baılanysty dep oılaımyz. 2019 jyly jalpy sany 33 quqyqbuzýshylyq oqıǵasy tirkeldi. Onyń ózinde jan-janýarlardy atý emes, qoryq aýmaǵyna zańsyz kirý jáne taǵy basqa sekildi. Al bıyldyqqa eshqandaı zańbuzýshylyq áreket tirkelgen joq», - dedi ol.
Sondaı-aq, qoryq basshysynyń orynbasary maman jetispeýshiligi máselesin sóz etti.
«Búginde ınspektorlar men qoryqshylarǵa qoıylatyn talaptar kúsheıip, olarǵa jaǵdaı jasaý jaqsara tústi. Buryn qoryqshylyqqa kez kelgen adamdy alatyn bolsa, qazir tek mamandyqqa saı bolýy tıis degen talap qoıyldy. Degenmen bizde maman jetispeýshilik máselesi bar. Shtatta 45 adam, al qaraıtyn aýmaǵymyz 700 myń gektar, árıne, bul azdyq etedi. Sonymen qatar elorda jaqyn bolǵandyqtan qoryqqa týrıster jıi keledi. Osy baǵytta bizde eko-aǵartý degen bólim bar. Ondaǵy 6 maman týrıstik uıymdarmen tikeleı jumys isteıdi. Byltyrǵy esep boıynsha 8 myń týrıst keldi, al bıyl kornavırýs indetine baılanysty týrızmdi toqtatýymyzǵa týra keldi», - deıdi J. Jurtbaev.
Aıta ketsek, QR Ekologııa, geologııa jáne tabıǵı resýrstar mınıstrligi Qorǵaljyn memlekettik tabıǵı qoryǵyndaǵy kıikterdi qorǵaý jumystarymen tanystyrý maqsatynda BAQ ókilderine baspasóz týryn uıymdastyrdy.
Jalpy mınıstrlik bergen málimetke súıensek, jyl basynan beri brakonerlerden 256 tutastaı kıik eti men 1245 múıizi, 5 qaraquıryq eti jáne 2 ıtelgi tárkilendi.
