Qorǵaljyn qoryǵynda 5 myńǵa jýyq qoqıqaz vıdeoǵa ilindi
«Qazaqstannyń bıologııalyq alýantúrlilikti saqtaý qaýymdastyǵynyń qyzmetkerleri Qorǵaljyn qoryǵynyń Saýmalkól kólinen shamamen 5 myń qoqıqazdy baıqady. Vıdeodan qoqıqazben qatar, Qazaqstannyń qyzyl kitabyna engen suńqyldaq aqqý men aqbas úırekti de baıqaýǵa bolady. Sonymen qatar jaǵalaýdan obektıvke ilinbeı qalǵan shamamen 500 aqbas tyrna kózge tústi», - delingen qaýymdastyqtyń Instagram-paraqshasynda jarııalanǵan vıdeo sıpattamasynda.
Mamandardyń aıtýyna qaraǵanda, jylda osy mezgilde Qorǵaljyn qoryǵyna álýan túrli qustar ushyp keledi.
«Kóktemde erigen qar sý mol bolyp, kóldiń deńgeıi kóteriledi. Al jazda sý deńgeıi tómendep, ártúrli qustar, onyń ishinde qoqıqaz da ushyp keledi. Taıaz kólde sý tez jylynyp, qustar qorektenetin baldyr men basqa da jándikter jyldam kóbeıedi», - dep atap ótedi Qazaqstannyń bıologııalyq alýantúrlilikti saqtaý qaýymdastyǵynan.
Vıdeodan alynǵan kadr/instagram.com/acbk.kz
