Qorǵaljyn aýdanynyń 90 jyldyǵy atalyp ótildi
KÓKShETAÝ. QazAqparat - Aqmola oblysynyń Qorǵaljyn aýdany 90 jyldyǵyn dúrkiretip atap ótti, dep habarlaıdy QazAqparat tilshisi.
Ótken ǵasyrdyń 20-30 jyldary aralyǵynda elimizde ákimshilik basqarý qurylymyna biraz ózgerister engizilip, ár aımaqta aýdandar ashyla bastaǵandyǵy belgili. 1928 jyly Aqmola óńirinde de birneshe aýdan quryldy. Soldardyń biri - Qorǵaljyn aýdany. Búgingi kúni aýdan óziniń teńdesiz tabıǵatymen erekshelenedi. Aýdandaǵy kólder balyq, qustarǵa baı. Onyń ishinde osynda uıa salatyn qyzyl qoqıqaz da bar.
Aýdan ortalyǵynda uıymdastyrylǵan saltanatty shara jergilikti qolóner sheberleriniń «sheberler aýly» kórme jármeńkesimen bastaldy. Odan ári jergilikti kórkem ónerpazdar ujymynyń oryndaýdaǵy merekelik kontsertke ulasty. Jınalǵan jurtshylyq aldynda oblys ákiminiń birinshi orynbasary Asqarbek Úısimbaev sóz sóılep, mereıli merekemen quttyqtady.
«Bul óńirdi qazaqtyń ejelgi qonysy, ejelden tarıhy tanymal, qasıetti meken dep barshamyz maqtan tutamyz», - dedi Asqarbek Úısimbaev.
Mereke aıasynda aýdandyq mádenıet úıinde ótkizilgen tarıhı-tanymdyq «Qorǵaljyn» atty kitaptyń tusaýkeseri ótkizildi. «Dáýren» stadıonynda Aqmola oblysynyń irgeles aýdandary men Astana qalasynan, Qaraǵandy oblysynan kelgen 12 komandanyń qatysýymen fýtboldan respýblıkalyq jarysta uıymdastyrylsa, «Bytyǵaı» etno aýylyndaǵy atshabarda Ulttyq sport oıyndarynan, atap aıtqanda, kókpar, aýdaryspaq, teńge alý, qoshqar kóterý, qol kúrestirý, asyq oınaý, qazaqsha kúresterden jarystar ótkizildi. Sondaı-aq, elimizge tanymal sportshy, KSRO-nyń eńbek sińirgen jattyqtyrýshysy, KSRO áýe-desant áskeriniń úsh dúrkin absolıýtti chempıony, erejesiz jekpe-jekten álemniń toǵyz dúrkin chempıony, kezinde kıkboksıngten KSRO qurama komandasynyń jatyqtyrýshysy bolǵan, búginde halyqaralyq «Jekpe-jek» federatsııasynyń prezıdenti, osy eldiń týmasy Sabyrjan Mahmetovtyń uıymdastyrýymen ótken jekpe-jekten halyqaralyq jarysta tartysty boldy.
Al, Qorǵaljyn memlekettik qoryǵynyń 50 jyldyǵyna arnalǵan ǵylymı-praktıkalyq konferentsııa aýdan mereıtoıynyń mánin asha tústi.
