Qorǵaljyn aýdanynda 7,5 mıllıard teńgeniń aýyl sharýashylyǵy ónimi óndirildi
KÓKShETAÝ. QazAqparat - Aqmola oblysynyń Qorǵaljyn aýdanynda 7,5 mıllıard teńgeniń aýyl sharýashylyǵy ónimi óndirildi, dep habarlaıdy QazAqparat tilshisi.
Aýdan ákimi Baýyrjan Ǵaısa óńir turǵyndarynyń ál-aýqatyn arttyrý baǵytynda júzege asyrylyp jatqan memlekettik baǵdarlamalar men áleýmettik-ekonomıkalyq damý kórsetkishterine toqtaldy. Astananyń irgesindegi aýdannyń ekonomıkasynda ótken jyly oń ózgerister baıqaldy. Aýdan bıýdjeti 100 paıyz oryndaldy. Oblys boıynsha aýdan úshinshi kórsetkishke qol jetkizdi.
«Onyń ishinde jyl qorytyndysy boıynsha negizgi kapıtalǵa salynǵan ınvestıtsııalar kólemi 2,5 mıllıard teńgeni qurasa, qurylys jumystarynyń kólemi 992,3 mıllıon teńgege jetip, 3498 sharshy metr baspana paıdalanýǵa berildi. Aýyl sharýashylyǵy salasynda 7,5 mıllıard teńgeniń ónimi óndirildi», - deıdi Aqmola oblystyq ishki saıasat basqarmasynyń janyndaǵy óńirlik kommýnıkatsııalar qyzmetinde óńirdiń 2018 jylǵy áleýmettik-ekonomıkalyq damýynyń qorytyndysy týraly jýrnalıstermen ótken brıfıngte Qorǵaljyn aýdanynyń Baýyrjan Ǵaısa.
Brıfıngte aıtylǵandaı, ótken jyly aýdan dıqandary ár gektardan 11,4 tsentnerden shyqqanda 128,2 myń tonna astyq jınady. Aýdanda «Sybaǵa», «Altyn asyq» jáne «Qulan» baǵdarlamalary sheńberinde mal sharýashylyǵyn damytý boıynsha naqtyly jobalar qolǵa alynǵan. Mal sharýashylyǵyn sýbsıdııalaý kólemi 61,1 mıllıon teńgeni qurady. Nátıjesinde iri qara sany 22,3 myń bas, qoı men eshki 32,3 myń jáne jylqy 12,1 myńǵa jetip otyr.
Aýdanda shaǵyn jáne orta bıznes salasyn damytýǵa jetkilikti kóńil bólinýde. Ótken jyly aýdanda barlyǵy 671 kásipkelik sýbektisi tirkelipti. Aýyl sharýashylyǵy jerlerin tsıfrlandyrý jumystary da oıdaǵydaı júrgizilýde.
